తెలంగాణలో భారీ వర్షాలు: ప్రాజెక్టులకు భారీ వరద, నిజామాబాద్‌లో పంట నష్టం

రాష్ట్రవ్యాప్తంగా ఎడతెరిపి లేకుండా కురుస్తున్న వర్షాలతో వాగులు, వంకలు పొంగుతున్నాయి. నిజామాబాద్ జిల్లా సిరికొండ మండలం కొండాపూరి చెరువు కట్ట మెరిసి గండి పడింది. దీంతో వరద నీరు పరిసర పంట పొలాలను ముంచెత్తింది.

సిరికొండ మండలంలోని వందల ఎకరాల వరి పంట నీట మునిగింది. ఇసుక మేటలు వేయడంతో పంట పూర్తిగా దెబ్బతిన్నట్లు స్థానిక రైతులు ఆవేదన వ్యక్తం చేశారు. సిర్నాపల్లి, శీలం జానకిబాయి చెరువులు కూడా నిండి మత్తడి పారుతున్నాయి. కరీంనగర్ జిల్లా తిమ్మాపూర్ మండలంలో భారీ వర్షం కురవడంతో రోడ్లు జలమయమయ్యాయి.

హైదరాబాద్ నగరంలో మధ్యాహ్నం తర్వాత వర్షం పడింది. కోటి, ఆబిడ్స్, నాంపల్లి, జూబ్లీ హిల్స్, బంజారా హిల్స్, బేగంపేట, బషీర్‌బాగ్, హిమాయత్‌నగర్, నారాయణగూడ, సికింద్రాబాద్ కంటోన్మెంట్ ప్రాంతాల్లో జల్లులు పడ్డాయి.

వర్షాల వల్ల శ్రీరామ్‌సాగర్ ప్రాజెక్టుకు 21,000 క్యూసెక్కుల వరద వచ్చి చేరింది. నీటిమట్టం 1,078 అడుగులకు చేరుకోగా, పూర్తి సామర్థ్యం 1,091 అడుగులు. శ్రీపాద ఎల్లంపల్లి ప్రాజెక్టుకు 2,621 క్యూసెక్కుల ఇన్‌ఫ్లో, 12,908 క్యూసెక్కుల అవుట్‌ఫ్లో నమోదైంది. మెదక్ జిల్లా సింగూరు ప్రాజెక్టులో నీటి నిల్వ 4,175 టీఎంసీలకు చేరింది.

కర్ణాటక నుంచి వచ్చిన వరదతో మహబూబ్‌నగర్ జిల్లా జూరాల ప్రాజెక్టుకు భారీగా నీరు చేరుకుంది. 29 గేట్లు ఎత్తి 2,24,741 క్యూసెక్కుల నీటిని దిగువకు వదులుతున్నారు. శ్రీశైలం జలాశయానికి 2,16,000 క్యూసెక్కుల ఇన్‌ఫ్లో రాగా, కాలువల ద్వారా 2,350 క్యూసెక్కుల నీటిని విడుదల చేస్తున్నారు. శ్రీశైలం నీటిమట్టం 871 అడుగులకు చేరింది (పూర్తి స్థాయి 885 అడుగులు).