తెలంగాణలో మూడు రోజుల పాటు రిజిస్ట్రేషన్ సేవలు బంద్

తెలంగాణలో రిజిస్ట్రేషన్ సేవలు వరుసగా మూడు రోజుల పాటు నిలిచిపోనున్నాయి. స్టాంప్స్ అండ్ రిజిస్ట్రేషన్ శాఖ ఈ మేరకు ప్రకటన చేసింది.

సర్వర్ అప్‌గ్రేడేషన్, సాంకేతిక నిర్వహణ పనుల కారణంగా జూన్ 26 నుంచి 28 వరకు ఈ సేవలు నిలిపివేస్తున్నట్లు శాఖ ఐజీ రాజీవ్ గాంధీ హనుమంతు తెలిపారు.

ఈ మూడు రోజుల్లో రాష్ట్రంలోని అన్ని సబ్ రిజిస్ట్రార్ కార్యాలయాల్లో భూమి, ఇల్లు, ఆస్తుల రిజిస్ట్రేషన్లు నిర్వహించరు. అధికారిక వెబ్‌సైట్, ఆన్‌లైన్ సేవలు కూడా అందుబాటులో ఉండవని ఆయన స్పష్టం చేశారు.

సుమారు ఐదేళ్ల తర్వాత సర్వర్లను పూర్తి స్థాయిలో అప్‌గ్రేడ్ చేస్తున్నామని, ఈ పనులు పూర్తయితే రిజిస్ట్రేషన్ సేవలు మరింత వేగంగా, సురక్షితంగా అందుబాటులోకి వస్తాయని ఆయన వివరించారు.

అత్యవసర రిజిస్ట్రేషన్లు ఉన్నవారు జూన్ 26 ముందే తమ పనులు పూర్తి చేసుకోవాలని శాఖ సూచించింది. జూన్ 29 నుంచి అన్ని సేవలు యథావిధిగా ప్రారంభం అవుతాయని తెలిపారు.