తెలంగాణలో నేడు 2.64 కోట్ల మందితో ముసాయిదా ఓటరు జాబితా విడుదల

తెలంగాణలో నేడు ముసాయిదా ఓటరు జాబితా విడుదల కానుంది. ఈ జాబితాలో 2,64,87,214 మంది ఓటర్లు ఉన్నారు. అఖిల పక్ష సమావేశం ముగిసిన తర్వాత ఎన్నికల అధికారులు ఈ జాబితాను విడుదల చేస్తారు.

ప్రస్తుత ఓటరు జాబితాలో 3,38,26,448 మంది ఉన్నారు. ప్రత్యేక సమగ్ర సవరణలో భాగంగా అధికారులు 73,39,234 ఓట్లను తొలగించారు. వీరిలో 9,22,230 మంది మరణించినట్లు గుర్తించారు. మరో 11,25,546 మంది చిరునామాల్లో అందుబాటులో లేరని CEO కార్యాలయం తెలిపింది.

ఎన్యుమరేషన్ ఫారాలు ఇచ్చిన వారిలో 92 లక్షల మందికి పైగా నోటీసులు రానున్నాయి. వీరిలో 32.36 లక్షల మంది గత 2002 SSR వివరాలు ఇవ్వలేదు. మరో 61 లక్షల మంది ఇచ్చిన వివరాలు సరైనవి కావని CEO కార్యాలయం గుర్తించింది.

నేటి నుంచి సెప్టెంబర్ 17 వరకు ఓటర్ల వివరణలు, అభ్యంతరాలు స్వీకరిస్తారు. అక్టోబర్ 19న తుది ఓటరు జాబితా ప్రకటిస్తారు. నోటీసులు వచ్చిన వారు కేంద్ర ఎన్నికల కమిషన్ ప్రకటించిన 12 డాక్యుమెంట్లలో ఒకటి సమర్పించాలి.