తెలంగాణలో బియ్యం ధరలు జాతీయ సగటును మించి పెరిగాయి

మే నెలలో కిలో రూ.51 ఉన్న బియ్యం ధర, జూలై నాటికి రూ.54కు చేరింది. మూడు నెలల్లోనే 4.65% పెరిగింది. అదే సమయంలో దేశవ్యాప్తంగా సగటు ధర 3.33% మాత్రమే పెరిగి రూ.44.35గా నమోదైంది. దీంతో తెలంగాణలో కిలో బియ్యం సగటు ధర జాతీయ సగటు కంటే రూ.10 ఎక్కువగా ఉంది.

ప్రస్తుతం ఫైన్ రకాల బియ్యం ధరలు కిలోకు రూ.54 నుంచి రూ.70 వరకు పలుకుతున్నాయి. జై శ్రీరామ్ వంటి ప్రీమియం బియ్యం రూ.70 వరకు అమ్ముతున్నారు. హెచ్ఎంటీ, బీపీటీ రకాలు గత ఐదు నెలల్లో కిలోకు రూ.10 పెరిగాయి. 25 కేజీల బస్తా ధర రూ.1200-1300 నుంచి రూ.1600-1700కు చేరింది.

బియ్యం ధరల పెరుగుదలతో పాటు కూరగాయలు, పప్పులు, నూనెల ధరలు కూడా పెరగడంతో సామాన్య కుటుంబాల బడ్జెట్‌పై ఒత్తిడి పెరిగింది. ఒక కుటుంబానికి నెలవారి ఖర్చు రూ.25,000 వరకు ఉండటంతో, ధరలు పెరిగినా ఆదాయం అదే స్థాయిలో ఉండడంతో ఇబ్బందులు ఎదురవుతున్నాయని వినియోగదారులు చెబుతున్నారు.

ధాన్యం ధరలు పెరగడం, వర్షాల కొరత, ప్రైవేటు వ్యాపారులు నిల్వ చేయడం వంటి కారణాలతో బియ్యం ధరలు పెరుగుతున్నాయని వ్యాపారులు అంటున్నారు. రాష్ట్రం నుంచి ఇతర రాష్ట్రాలకు ధాన్యం, బియ్యం ఎగుమతి కూడా ధరల పెరుగుదలకు కారణమని వారు చెప్పారు. సరఫరా డిమాండ్ కు సరిపడా లేకపోవడంతో మార్కెట్లో ధరలు పైకి వెళ్తున్నాయి.

ధరల నియంత్రణ కోసం ప్రభుత్వం మార్కెట్ పై నిఘా పెట్టాలని, నిల్వదారులపై చర్యలు తీసుకోవాలని వినియోగదారులు డిమాండ్ చేస్తున్నారు. ధాన్యం ఇతర రాష్ట్రాలకు తరలించడాన్ని నియంత్రిస్తే ధరలు తగ్గుతాయని వ్యాపారులు కూడా సూచిస్తున్నారు. ప్రస్తుతం బియ్యం ధరల పరిస్థితిపై ప్రభుత్వం ఎలాంటి చర్యలు తీసుకుంటుందో చూడాలి.