తెలంగాణ ఆర్టీసీ జేబీఎం ఎలక్ట్రిక్ బస్సులను తాత్కాలికంగా నిలిపివేత

తెలంగాణ ఆర్టీసీ ప్రయాణికుల భద్రతకు ప్రాధాన్యతనిస్తూ కీలక నిర్ణయం తీసుకుంది. రాష్ట్రవ్యాప్తంగా డిపోల పరిధిలో నడుస్తున్న జేబీఎం ఎలక్ట్రిక్ బస్సుల సేవలను తాత్కాలికంగా నిలిపివేసింది.

ఈ నేపథ్యంలో హైదరాబాద్ బస్ భవన్‌లో కమాండ్ కంట్రోల్ సెంటర్ ఏర్పాటు చేశారు. 100 శాతం భద్రత ధృవీకరణ పత్రం లభించిన తర్వాతే సేవలు పునరుద్ధరిస్తామని యాజమాన్యం స్పష్టం చేసింది.

జాతీయ ఎలక్ట్రిక్ బస్ ప్రోగ్రాం కింద తెలంగాణలో జేబీఎం సంస్థ ఎలక్ట్రిక్ బస్సులు నడుపుతోంది. ఇటీవల ఈ బస్సుల్లో హై వోల్టేజ్ బ్యాటరీ అగ్ని ప్రమాదాలు వరుసగా చోటు చేసుకున్నాయి. గత నెల జూన్ 21న కరీంనగర్ సమీపంలోని అలుకునూరు వద్ద ఓ బస్సు దగ్ధమైంది. దీనిపై పూర్తి నివేదిక రాకముందే మరో ప్రమాదం జరగడంతో ఆర్టీసీ ఈ నిర్ణయం తీసుకుంది.

ఆర్టీసీ విజ్ఞప్తిపై జేబీఎం స్పందించింది. చైనా నుంచి బ్యాటరీ నిపుణుల బృందంతో కూడిన సాంకేతిక బృందాన్ని రంగంలోకి దించింది. ప్రమాద కారణాలను పరిశీలించి నివారణ చర్యలపై నివేదిక తయారు చేస్తోంది.

సాంకేతిక బృందం ధృవీకరించిన తర్వాతే బస్సుల పునరుద్ధరణపై తుది నిర్ణయం తీసుకుంటామని ఆర్టీసీ అధికారులు తెలిపారు.