తెలంగాణలో సెక్షన్ 22A భూముల యాజమాన్య పునఃపరిశీలన: భూస్వాములు తెలుసుకోవాల్సిన విషయాలు

తెలంగాణలో సెక్షన్ 22A కింద నమోదైన భూముల యాజమాన్యాన్ని పునఃపరిశీలించాలని ప్రభుత్వం ఆదేశించింది. ఈ ప్రక్రియలో భాగంగా రీసర్వే నిర్వహించి తప్పుడు ఎంట్రీలను సరిచేయనున్నట్లు రియల్ ఎస్టేట్ నిపుణుడు డాక్టర్ నంది రామేశ్వరరావు వివరించారు.

1908 నాటి రిజిస్ట్రేషన్ చట్టంలోని సెక్షన్ 22A ప్రకారం, ప్రభుత్వానికి చెందిన అసైన్డ్ భూములు, అటవీ భూములు, ఎండోమెంట్ భూములు, చెరువులు, నీటి పరివాహక ప్రాంతాలు (FTL), బఫర్ జోన్లు లాంటివి ప్రైవేటుగా విక్రయించడానికి వీలుండదు. కానీ కొన్ని సందర్భాల్లో యజమాన్యం సరిగా నమోదు కాకపోవటం, సర్వే లోపాల వల్ల ప్రైవేటు భూములు కూడా ఈ జాబితాలో చేరిపోవడం జరిగిందని ఆయన చెప్పారు.

ప్రస్తుతం జరుగుతున్న డిజిటల్ రీసర్వే వల్ల ఈ లోపాలు బయటపడుతున్నాయి. సరైన యజమానులకు భూమి దక్కేలా, అక్రమ ఆక్రమణలను అడ్డుకునేందుకు ప్రభుత్వం ఈ చర్యలు తీసుకుంటోందని నిపుణుడు తెలిపారు. తమ భూమి 22A జాబితాలో చేరిందని అనుమానించే వ్యక్తులు మూడు మార్గాల్లో పరిష్కారం పొందవచ్చు.

ముందుగా కలెక్టర్‌ను సంప్రదించి తమ సర్వే నంబరు యాజమాన్యం సరైనదేనా అని నిర్ధారించుకోవచ్చు. కలెక్టర్ సమాధానం ఇవ్వకపోతే బౌండరీస్ అండ్ సర్వే విభాగానికి దరఖాస్తు చేసుకోవాలి. అక్కడా ఫలితం లేని పక్షంలో కోర్టును ఆశ్రయించి యాజమాన్యపు రుజువులతో స్టాంప్ పొందొచ్చు. రీసర్టిఫికేషన్ ప్రక్రియ పూర్తయ్యే వరకు ఈ అవకాశాలు అందుబాటులో ఉంటాయని డాక్టర్ నంది రామేశ్వరరావు సూచించారు.