119 నియోజకవర్గాల అభివృద్ధికి ఎంఓయూ; సీడీఎక్స్ కార్యక్రమం ప్రారంభం

తెలంగాణ శాసనసభ సచివాలయం, ఈక్విప్ సోషల్ ఇంపాక్ట్ టెక్నాలజీ సంస్థ మధ్య రాష్ట్రంలోని 119 నియోజకవర్గాల సమగ్రాభివృద్ధిని లక్ష్యంగా అవగాహన ఒప్పందం (ఎంఓయు) కుదిరింది. కాన్స్టిట్యూయెన్సీ డెవలప్‌మెంట్ ఎక్సేంజ్ (సీడీఎక్స్) పేరిట శాసనమండలి ఆవరణలో ఈ కార్యక్రమం నిర్వహించారు.

ప్రభుత్వ, ప్రైవేట్ సంస్థల భాగస్వామ్యంతోనే నియోజకవర్గాల అభివృద్ధి సాధ్యమని శాసనమండలి చైర్మన్ గుత్త సుకేందర్ రెడ్డి పేర్కొన్నారు. ఈ ఎంఓయు నియోజకవర్గాల్లో నూతన ఆవిష్కరణలు, సహకారం, పౌర భాగస్వామ్యం ద్వారా అభివృద్ధికి మార్గదర్శకంగా నిలుస్తుందని శాసనసభ స్పీకర్ ప్రసాద్ కుమార్ ఆశాభావం వ్యక్తం చేశారు. స్థానిక ఎమ్మెల్యేల సలహాలతో ఈక్విప్ సంస్థ క్షేత్ర స్థాయిలో పనిచేస్తుందని ఆయన తెలిపారు.

ప్రభుత్వ నిధులపైనే ఆధారపడకుండా స్థానిక వనరులను ఉపయోగించుకుని ఉపాధి అవకాశాలు సృష్టించవచ్చని మంత్రి శ్రీధర్ బాబు హామీ ఇచ్చారు. నియోజకవర్గాల వారీగా రూట్ మ్యాప్ రూపొందించుకుని పనిచేయడం ద్వారా రాష్ట్రం మొత్తం అభివృద్ధి చెందుతుందని ఆయన అన్నారు. ముందు ముందుకు వచ్చే నియోజకవర్గాలకు ప్రాధాన్యత ఇస్తామని, ఒక నియోజకవర్గంలో జరిగే పనులు చూసి ఇతరులు స్ఫూర్తి పొందుతారని ఆయన వివరించారు.

ఈ కార్యక్రమానికి శాసనసభ సచివాలయం నుంచి ఎటువంటి ప్రభుత్వ నిధులు ఖర్చు కావడం లేదని, సచివాలయంపై ఒక్క రూపాయి కూడా భారం కాదని నిర్వాహకులు స్పష్టం చేశారు.