పల్నాడు: మెగా రుణ మేళాలో లక్ష మందికి ₹3,216 కోట్ల రుణాలు

ముఖ్యమంత్రి చంద్రబాబు నాయుడు, కేంద్ర ఆర్థిక మంత్రి నిర్మల సీతారామన్ మంగళవారం పల్నాడు జిల్లా నరసరావుపేటలోని కోడెల శివప్రసాద్ రావు స్టేడియంలో మెగా రుణ మేళా (credit outreach) కార్యక్రమంలో పాల్గొన్నారు.

ఈ కార్యక్రమంలో 1,03,245 మంది లబ్ధిదారులకు మొత్తం 3,216 కోట్ల రూపాయల రుణాలు మంజూరు చేశారు. ఇందులో వ్యవసాయ రంగానికి అత్యధికంగా 83,365 ఖాతాలకు 2,286 కోట్ల రూపాయలు కేటాయించారు. మహిళలు, చేతివృత్తుల వారికి ముద్ర, పీఎం స్వనిధి, పీఎం విశ్వకర్మ తదితర పథకాల ద్వారా 4,412 ఖాతాలకు 313.19 కోట్ల రుణాలు ఇచ్చారు.

పల్నాడు జిల్లాలో 16 మండలాల్లో 52 కోట్ల రూపాయల పెట్టుబడితో 16 ఫుడ్ ప్రాసెసింగ్ యూనిట్లను ఏర్పాటు చేస్తున్నట్లు అధికారులు తెలిపారు. కార్యక్రమం ముగిశాక ముఖ్యమంత్రి, కేంద్ర మంత్రి ఏపీ రాష్ట్ర ఆర్థిక అంశాలు, పోలవరం ప్రాజెక్టు, రాజధాని నగర నిధులు సహా వివిధ అంశాలపై చర్చించనున్నారు.