ప్రధాని మోదీ నేడు మూడు ఆంధ్రప్రదేశ్ రైల్వే స్టేషన్లను వర్చువల్‌గా ప్రారంభించనున్నారు

ప్రధాని నరేంద్ర మోదీ నేడు అమృత్ భారత్ స్టేషన్ పథకం కింద పునరాభివృద్ధి చేసిన మూడు ఆంధ్రప్రదేశ్ రైల్వే స్టేషన్లను వర్చువల్‌గా ప్రారంభించనున్నారు. ఈ స్టేషన్లు మంగళగిరి (గుంటూరు జిల్లా), రాయనపాడు (ఎన్టీఆర్ జిల్లా), కంభం (ప్రకాశం జిల్లా). వీటి ఆధునీకరణకు మొత్తం సుమారు రూ.60 కోట్లు ఖర్చు చేశారు.

మంగళగిరి స్టేషన్‌ను రూ.12.56 కోట్లతో నూతనంగా తీర్చిదిద్దారు. ప్రధాన భవనం ఆధునికీకరించడంతో పాటు వెయిటింగ్ హాల్స్, లిఫ్ట్‌లు, రెండు కొత్త ప్లాట్‌ఫారాలు ఏర్పాటు చేశారు. అమరావతి అవసరాలను దృష్టిలో పెట్టుకుని నమలూరు వైపు రెండో ప్రవేశ ద్వారం, బుద్ధుడి విగ్రహం ఏర్పాటు చేశారు. స్థానిక చేనేత సంస్కృతిని గుర్తుచేస్తూ ఒక మహిళా చేనేత కార్మికురాలి నమూనా కూడా ఏర్పాటు చేశారు. గతంలో ఇక్కడ కొన్ని రైళ్లు మాత్రమే ఆగేవి. ప్రస్తుతం ఎక్స్‌ప్రెస్ రైళ్లు ఆగడంతో పాటు ఎయిమ్స్ మంగళగిరి, నరసింహస్వామి క్షేత్రానికి వచ్చే ప్రయాణికులకు ప్రయోజనకరంగా మారింది.

రాయనపాడు రైల్వే స్టేషన్‌ను రూ.35.67 కోట్లతో ఆధునికీకరించారు. ఇక్కడ ప్రీపెయిడ్ వెయిటింగ్ హాల్, ఆధునిక మరుగుదొడ్లు, కొండపల్లి బొమ్మల పెయింటింగ్‌లతో ప్రాంగణం అలంకరించారు. రెండు లిఫ్ట్‌లు, వికలాంగులకు ప్రత్యేక సౌకర్యాలు కల్పించారు.

కంభం రైల్వే స్టేషన్‌ను రూ.11.72 కోట్లతో పునరాభివృద్ధి చేశారు. మొదటి ప్లాట్‌ఫాం‌పై అదనపు షెల్టర్లు, వికలాంగులకు ర్యాంపు, వెయిటింగ్ రూమ్‌లు, లిఫ్ట్, పిల్లలకు పాలిచ్చే గది, కోచ్ పొజిషన్ బోర్డులు, ఒంగోలు ఎద్దుల చిత్రాలు ఏర్పాటు చేశారు. కేంద్ర ప్రభుత్వం చేపట్టిన ఈ పథకంలో స్థానిక ప్రజాప్రతినిధుల చొరవతో ఈ స్టేషన్లు ఎంపికయ్యాయని దక్షిణ కోస్తా రైల్వే అధికారులు తెలిపారు.