హైదరాబాద్ శివారులో ఈగల్ పోలీస్ దాడి: లారీలో 237 కిలోల గంజాయి సీజ్, ఇద్దరు అరెస్ట్

జూన్ 15వ తేదీ రాత్రి హైదరాబాద్ శివారు ఎన్హెచ్-65 పై వైఎన్ఆర్ ఫంక్షన్ హాల్ సమీపంలో ఈగల్ పోలీసులు తనిఖీలు నిర్వహించారు. ఈ తనిఖీలో ఓ ఐషర్ లారీలో దాచిన 237 కిలోల గంజాయిని గుర్తించారు. లారీలో ఉన్న రాజేశ్ కుమార్, అనిల్ రంగనాథ్ బిచారీలను అరెస్టు చేశారు. వీరి నుండి మూడు సెల్‌ఫోన్లు కూడా స్వాధీనం చేసుకున్నారు.

విచారణలో ఒడిస్సా నుండి మహారాష్ట్రలోని పుణేకు ఈ గంజాయి రవాణా జరుగుతున్నట్లు తేలింది. ఈ రవాణాకు సహకరిస్తున్న సురేశ్ కేదారీ (పుణే), ధరం షిండే (పుణే), పవిత్ర కుమార్ సబర్ (ఒడిస్సా) అనే ముగ్గురు పరారీలో ఉన్నారు. స్వాధీనం చేసుకున్న గంజాయి విలువ సుమారు ₹1.38 కోట్లుగా అంచనా వేసినట్లు ఈగల్ ఎస్పీ గిరిధర్ తెలిపారు.

పోలీసుల కథనం ప్రకారం, ఇదే ముఠాకు చెందిన వారిపై గతంలోనూ పలు కేసులు నమోదైనాయి. మే 16న రాచకొండ నార్కోటిక్స్ పోలీసులు చౌటుప్పల్ టోల్ ప్లాజా వద్ద 455 కిలోల గంజాయి (₹2.75 కోట్లు) సీజ్ చేశారు. మే 21న ఖమ్మం ఈగల్ ఫోర్స్ 20 కిలోల గంజాయి, నలుగురు నిందితులను అదుపులోకి తీసుకుంది. జూన్ 12న కూడా 202 కిలోల గంజాయి (₹1.5 కోట్లు) పట్టుబడింది.

పరారీలో ఉన్న ముగ్గురి కోసం ప్రత్యేక బృందాలు గాలిస్తున్నాయి. అంతర్రాష్ట్ర గంజాయి రవాణా నెట్వర్క్పై దర్యాప్తు కొనసాగుతుందని ఈగల్ ఎస్పీ వివరించారు.