కరీంనగర్ PMJ జువెలరీ దోపిడీ కేసు పోలీసు కేస్ స్టడీగా మారింది

కరీంనగర్‌లో జరిగిన PMJ జువెలరీ దోపిడీ కేసు ఇప్పుడు తెలంగాణ పోలీసుల శిక్షణలో భాగమైంది. కొత్తగా నియమితులైన DSP లకు ఈ కేసును కేస్ స్టడీగా చెప్పాలని తెలంగాణ పోలీసు విభాగం నిర్ణయించింది. రెండు నెలల కిందట కరీంనగర్‌లో బంగారం దుకాణాన్ని దోచుకున్న సుభాష్ సింగ్ గ్యాంగ్ ఏ విధంగా వచ్చారు, ఎలా దోపిడీ చేశారు, ఎలా పారిపోయారు అనే వివరాలన్నీ కొత్త DSP లకు నేర్పించాలని నిర్ణయించారు. గ్యాంగ్ లీడర్ జైలులో ఉండి కూడా మిగతావారికి పది నిమిషాల్లో లూటీ చేసే పద్ధతులు నేర్పించాడు. ఫోన్లు వాడకుండా ప్రత్యేక యాప్ ద్వారా సంప్రదించారు. మెయిన్ రోడ్లు వాడకుండా పిల్లబాటల్లో వెళ్ళారు, నది దాటి రైలు ఎక్కారు. సాక్ష్యాలు దొరకకుండా అనేక జాగ్రత్తలు తీసుకున్నా కరీంనగర్ పోలీసులు వారిని అరెస్ట్ చేశారు. విచారణలో వెల్లడైన విషయాలు సినిమాలకు మించిన అనుభవంగా పోలీసులు భావించారు. ఈ కేసు వివరాలు తెలిసిన తర్వాత కొత్త అధికారులకు శిక్షణ ఇస్తున్నారని తెలియడంతో సుభాష్ సింగ్ గ్యాంగ్ ఆందోళనకు గురైంది.