తెలంగాణలో SIR ప్రక్రియ ముగింపు; 74 లక్షల మంది ఓటర్ల వివరాల డిజిటలైజేషన్ పెండింగ్

తెలంగాణలో ప్రత్యేక ఇంటెన్సివ్ ఓటరు రివిజన్ (SIR) ప్రక్రియ నేటితో ముగిసింది. రాష్ట్రంలో మొత్తం 3,38,26,448 మంది ఓటర్లు ఉండగా, ఇప్పటివరకు 2,64,30,494 మంది ఎన్‌రోల్‌మెంట్ ఫారాల డిజిటలైజేషన్ మాత్రమే పూర్తయింది. రాష్ట్ర స్థాయిలో డిజిటలైజేషన్ 78.08 శాతంగా నమోదయింది.

అన్ని జిల్లాల్లోనూ డిజిటలైజేషన్ ఒకే స్థాయిలో జరగలేదు. హైదరాబాద్ (58.58%) అత్యంత తక్కువ స్థానంలో ఉండగా, మల్కాజ్‌గిరి (63.82%), మేడ్చల్ (63.82%), రంగారెడ్డి (64.91%) జిల్లాలు కూడా వెనుకబడ్డాయి. హైదరాబాద్, రంగారెడ్డి, మేడ్చల్‌కు రెండుసార్లు SIR గడువు పొడిగించినా డిజిటలైజేషన్ పెరుగుదల కనిపించలేదు. యాదాద్రి భువనగిరి (94.30%), మెదక్ (90.54%), సూర్యపేట (90.43%) జిల్లాలు అత్యధిక డిజిటలైజేషన్ సాధించాయి.

పూర్తి కాని 74 లక్షల మంది ఓటర్ల వివరాలపై స్పష్టత రావాల్సి ఉంది. హైదరాబాద్ జిల్లాలో 47,36,669 మంది ఓటర్లలో సుమారు 58% మంది మాత్రమే ఎన్‌రోల్‌మెంట్ పూర్తి చేసినట్లు సమాచారం. దీంతో పెద్ద సంఖ్యలో ఓట్లు మినహాయింపుకు గురయ్యే అవకాశం ఉంది.

తదుపరి ప్రక్రియలో భాగంగా, ఈ నెల 17న తుది ఓటర్ల జాబితాను రాష్ట్ర ఎన్నికల కమిషన్ విడుదల చేయనుంది. ఆ జాబితా ద్వారా ఎంతమంది ఓటర్ల పేర్లు తొలగించబడ్డాయి, ఎంతమంది కొనసాగారనే విషయం స్పష్టం కానుంది.