తెలంగాణలో ఉష్ణోగ్రతలు క్రమంగా తగ్గుముఖం; 10 జిల్లాల్లో వర్ష సూచన

తెలంగాణలో గత రెండు రోజులుగా ఉష్ణోగ్రతలు క్రమంగా తగ్గుతున్నాయి. రాష్ట్రంలోని పలు జిల్లాల్లో రాబోయే రోజుల్లో వర్షాలు కురిసే అవకాశం ఉంది.

ప్రస్తుతం ఉత్తర తెలంగాణ, ఈశాన్య, తూర్పు ప్రాంతాల్లో ఇంకా 41°C నుంచి 44°C వరకు ఉష్ణోగ్రతలు నమోదవుతున్నాయి. పశ్చిమ, దక్షిణ తెలంగాణలో ఇప్పటికే వర్షం కురవడంతో ఉష్ణోగ్రతలు 36°C నుంచి 40°C కు తగ్గాయి. నిన్న ఖమ్మంలో 43.5°C అత్యధికంగా నమోదు కాగా, భద్రాద్రి కొత్తగూడెంలో ఒక్కసారిగా 5°C పెరిగి 41°C కు చేరుకుంది. నల్గొండ, సూర్యాపేట, వరంగల్ జిల్లాల్లో 41°C ఉష్ణోగ్రతలు కొనసాగుతున్నాయి.

విదర్భ నుంచి రాయలసీమ మీదుగా తెలంగాణ వరకు ఒక ద్రోణి ఏర్పడింది. దీని కారణంగా పశ్చిమ దిశ నుంచి తేమ గాలులు వస్తున్నాయి. ఈ ప్రభావంతో ఈరోజు కామారెడ్డి, మెదక్, సంగారెడ్డి, మహబూబ్‌నగర్, నాగర్‌కర్నూల్ జిల్లాల్లో తేలికపాటి జల్లులు పడే అవకాశం ఉంది. రేపు పశ్చిమ, ఉత్తర తెలంగాణతో పాటు వరంగల్ ప్రాంతంలోనూ జల్లులు కురుస్తాయని అంచనా.

ఎల్లుండి నుంచి రాష్ట్రవ్యాప్తంగా చాలా జిల్లాల్లో ఉరుములు, మెరుపులతో కూడిన వర్షాలు కురిసే సూచనలు ఉన్నాయి. దీంతో ఉష్ణోగ్రతలు మరింత తగ్గే అవకాశం కనిపిస్తోంది. ఇటీవల 45°C దాటిన ప్రాంతాల్లో కూడా ఉపశమనం లభిస్తుందని వాతావరణ నిపుణులు చెబుతున్నారు.