బోనాల పండుగ సందర్భంగా ఉజ్జయిని మహంకాళి ఆలయం వద్ద టూరిజం శాఖ బ్యాటరీ వాహనాలు

తెలంగాణ పర్యాటక శాఖ ఉజ్జయిని మహంకాళి అమ్మవారి బోనాల పండుగ సందర్భంగా ప్రత్యేక బ్యాటరీ వాహనాలను ఏర్పాటు చేసింది. వృద్ధులు, వికలాంగులు, నడవలేని భక్తులకు వీటి ద్వారా సౌకర్యం కల్పించడం జరుగుతోంది.

టూరిజం డ్రైవర్ టి. రాములు మాట్లాడుతూ, రాష్ట్ర పర్యాటక శాఖ ఆదేశాల మేరకు గత ఏడాది నుంచి ప్రతి బోనాల సమయంలో ఈ సేవలు అందిస్తున్నామని తెలిపారు. ప్రస్తుతం రెండు వాహనాలు నడుస్తున్నాయని, ఒకటి రామగోపాల్ పోలీస్ స్టేషన్ నుంచి ఆలయానికి, మరొకటి మహంకాళీ పోలీస్ స్టేషన్ నుంచి ఆలయానికి నడుస్తోందని చెప్పారు. ఇప్పటివరకు చాలామంది వయోవృద్ధులు, వికలాంగులు, న్యాయమూర్తులతో సహా ఎంతోమంది ఈ వాహనాలను వినియోగించుకున్నారని ఆయన వివరించారు.

ఓ భక్తుడు మాట్లాడుతూ, హ్యాండిక్యాప్ వ్యక్తులకు ఉజ్జయిని మహంకాళి ఆలయాన్ని సందర్శించడానికి బ్యాటరీ వాహనాలు చాలా సౌకర్యంగా ఉన్నాయని, టూరిజం శాఖకు ధన్యవాదాలు తెలిపారు.

బోనాల పండుగ తెలంగాణలో అత్యంత ప్రజాదరణ పొందిన ఉత్సవాల్లో ఒకటి. సికింద్రాబాద్‌లోని ఉజ్జయిని మహంకాళి ఆలయంలో ఈ పండుగ ఘనంగా జరుగుతుంది. భక్తుల రద్దీ ఎక్కువగా ఉన్న నేపథ్యంలో పర్యాటక శాఖ ఈ ప్రత్యేక ఏర్పాటు చేసింది.