తెలంగాణలో 74 లక్షల ఓటర్ల పేర్లు తొలగించే అవకాశం; ఎన్యూమరేషన్ ఫారాలు ఇవ్వాలని ఎన్నికల కమిషన్ హెచ్చరిక

తెలంగాణలో ఓటరు జాబితా సమగ్ర సవరణలో భాగంగా దాదాపు 74 లక్షల మంది ఓటర్ల పేర్లు తొలగించే పరిస్థితి ఏర్పడింది. ఇంటింటికి పంపిన ఎన్యూమరేషన్ ఫారాలు తిరిగి ఇవ్వనివారి పేర్లను ముసాయిదా జాబితా నుంచి తొలగిస్తామని ఎన్నికల కమిషన్ స్పష్టం చేసింది. ఈ ఫారాలు సమర్పించే గడువు రేపటితో ముగుస్తుంది.

ప్రస్తుత ఓటరు జాబితా ప్రకారం రాష్ట్రంలో 3,38,26,448 మంది ఓటర్లు ఉన్నారు. వీరందరికీ ఎన్యూమరేషన్ ఫారాలు పంపిణీ చేసినట్లు కమిషన్ తెలిపింది. అయితే 2,64,11,118 మంది ఓటర్లకు సంబంధించిన ఫారాలు మాత్రమే ఇప్పటివరకు డిజిటలైజేషన్ జరిగింది. మిగిలిన సుమారు 74 లక్షల మంది ఫారాలు వెనక్కి రాలేదని ఎన్నికల కమిషన్ వెల్లడించింది.

హైదరాబాద్ కోర్ అర్బన్ ప్రాంతంలో 40% వరకు ఓటర్ల పేర్లు తొలగింపునకు గురయ్యే అవకాశం ఉందని సమాచారం. ఇప్పటికీ 20% కంటే ఎక్కువ మంది ఫారాలు సమర్పించలేదు. ఎన్యూమరేషన్ ఫారాలు తిరిగి ఇవ్వని ఓటర్లు వెంటనే వాటిని సమర్పించాలని కమిషన్ కోరింది. రేపు సాయంత్రం లోపు ఫారాలు అందజేస్తే మాత్రమే ముసాయిదా ఓటరు జాబితాలో పేర్లు కొనసాగుతాయి.