తెలంగాణలో ఓటర్ల జాబితా సవరణ ప్రక్రియ ప్రారంభం

తెలంగాణలో ఓటర్ల జాబితా సవరణ (SIR) ప్రక్రియ ప్రారంభమైంది.

BLO అధికారులు ఇంటింటికీ వెళ్లి ఎన్యూమరేషన్ ఫారాలు పంపిణీ చేస్తున్నారు. రాష్ట్రంలోని 33 జిల్లాల పరిధిలో మండలాల వారీగా ఈ ప్రక్రియ నెల రోజుల పాటు కొనసాగుతుంది.

సుమారు 3.38 కోట్ల మంది ఓటర్ల వివరాలను సరిచూసేందుకు ఈ సర్వే నిర్వహిస్తున్నారు. గతంలో జరిగిన మ్యాపింగ్ లో 90 లక్షల మంది ఓటర్ల వివరాల్లో తేడాలు కనిపించాయని అధికారులు తెలిపారు. ఈ ప్రక్రియ ద్వారా అబ్సెంట్, స్థలం మారిన, మృతి చెందిన, డూప్లికేట్ ఓట్లను గుర్తించి తొలగిస్తారు.

వ్యక్తిగత గుర్తింపు కార్డు చూపించి ఏదైనా తప్పు ఉంటే సరిచేసుకోవచ్చు. సందేహాలకు 1950 హెల్ప్‌లైన్ నెంబర్‌కు ఫోన్ చేయవచ్చు. మంత్రి పొన్నం ప్రభాకర్, ఇతర అధికారులు కూడా కొన్ని ఇళ్లలో పరిశీలించారు.

జూలై 31న ముసాయిదా ఓటర్ల జాబితా విడుదలవుతుంది. ఇంకా నెల రోజుల పాటు (ఆగస్టు 31 వరకు) ఫిర్యాదుల ద్వారా సవరణలు చేసుకోవచ్చు. చివరి జాబితా అక్టోబర్ 1న ప్రచురిస్తారు. పేరు ఉంటే ఓటు హక్కు ఉంటుంది, లేకుంటే ఎన్నికల్లో పాల్గొనలేరని అధికారులు హెచ్చరిస్తున్నారు.