తెలుగు రాష్ట్రాల్లో 48°C దాటిన ఉష్ణోగ్రతలు — మరో మూడు రోజులు వడగాల్పులు

ఆంధ్రప్రదేశ్‌లో తూర్పు గోదావరి జిల్లా చిట్యాలలో 48.3 డిగ్రీల ఉష్ణోగ్రత నమోదైంది. ఇది ఏపీలో ఈ సీజన్‌లో అత్యధికంగా నమోదైన ఉష్ణోగ్రత.

పల్నాడు జిల్లా పిడుగురాళ్ళలో, పశ్చిమ గోదావరి జిల్లా తణుకులో 48.1 డిగ్రీలు నమోదయ్యాయి. ఏలూరు జిల్లా కుక్కునూరు, పోలవరం జిల్లా కోనవరంలో 47.3 డిగ్రీలు, కృష్ణా జిల్లా నందివాడలో 47.1 డిగ్రీలు నమోదయ్యాయి. మొత్తం 17 జిల్లాల్లోని 174 మండలాల్లో ఉష్ణోగ్రతలు 44 డిగ్రీలు దాటాయి.

తెలంగాణలో కొమరం భీం ఆసిఫాబాద్ జిల్లా దహేగాం మండలం కుంచవెల్లిలో 46.5 డిగ్రీలు నమోదైంది. మంచిర్యాల జిల్లా దండేపల్లి మండలం వెలగనూరులో 46.4 డిగ్రీలు, భద్రాద్రి కొత్తగూడెం జిల్లా అశ్వారావుపేటలో 46.3 డిగ్రీలు నమోదయ్యాయి.

వాతావరణ శాఖ మరో మూడు రోజులు వడగాల్పులు కొనసాగుతాయని హెచ్చరించింది. ఏపీలో 29 మండలాల్లో తీవ్ర వడగాల్పులు, 166 మండలాల్లో వడగాల్పులు వీచే అవకాశం ఉందని తెలిపింది. కోనసీమ, గోదావరి జిల్లాలు, ఏలూరు, NTR, కృష్ణా, గుంటూరు, బాపట్ల, పల్నాడు, ప్రకాశం జిల్లాల్లో 45 నుంచి 47 డిగ్రీల వరకు ఉష్ణోగ్రతలు చేరవచ్చని హెచ్చరించింది.

ఉదయం 11 గంటల నుంచి సాయంత్రం 4 గంటల మధ్య అత్యవసరమైతే తప్ప బయటకు రావద్దని అధికారులు సూచించారు.

మరోవైపు, విపత్తుల నిర్వహణ సంస్థ ప్రకారం ద్రోణి ప్రభావంతో మార్కాపురం, ప్రకాశం, కర్నూలు, నంద్యాల, అనంతపురం, చిత్తూరు జిల్లాల్లో పిడుగులతో కూడిన తేలికపాటి నుంచి మోస్తరు వర్షాలు పడే అవకాశం ఉందని తెలిపింది.