కన్నెపల్లి పంప్ హౌస్ పర్యటనకు వెళ్తున్న కేటీఆర్‌కు పోలీసులు అడ్డుకోవడంతో ఉద్రిక్తత

బీఆర్ఎస్ వర్కింగ్ ప్రెసిడెంట్ కేటీఆర్ కన్నెపల్లి పంప్ హౌస్ పర్యటనకు వెళ్తుండగా పోలీసులు జనగామ జిల్లా పెంబర్తి వద్ద జాతీయ రహదారిపై అడ్డుకున్నారు. కేవలం కేటీఆర్ వాహనానికి మాత్రమే అనుమతిస్తామని, ఇతర నేతలను అనుమతించమని పోలీసులు తెలపడంతో వాగ్వాదం జరిగింది.

పోలీసులు ఏర్పాటు చేసిన బారికేడ్లను బీఆర్ఎస్ నేతలు తొలగించి ముందుకు వెళ్లేందుకు ప్రయత్నించారు. దీంతో పోలీసులకు, బీఆర్ఎస్ శ్రేణులకు మధ్య తోపులాట జరిగింది. కాసేపు ఉద్రిక్త వాతావరణం నెలకొన్న తర్వాత కేటీఆర్ బయలుదేరి వెళ్లారు.

ఈ సందర్భంగా కేటీఆర్ మీడియాతో మాట్లాడుతూ రేవంత్ రెడ్డి ప్రభుత్వంపై విమర్శలు చేశారు. కన్నెపల్లి పంప్ హౌస్ నుంచి 96 మీటర్ల ఎత్తులో నీరు వృధాగా ప్రవహిస్తున్నదని, మోటార్లు ఆన్ చేసి లిఫ్ట్ చేస్తే గోదావరి జలాలు లభించే ప్రాంతాలకు సాగునీరు అందుతుందని అన్నారు. ప్రభుత్వ అసమర్థతతో నీటిని వృధా చేస్తోందని ఆరోపించారు. ఒక వారం రోజులు మాజీ ముఖ్యమంత్రి కేసీఆర్‌కు అవకాశమిస్తే కాళేశ్వరం ప్రాజెక్టును తిరిగి ప్రారంభించగలమని పేర్కొన్నారు.

ఈ పర్యటన నేపథ్యంలో వరంగల్ ఉమ్మడి జిల్లా వ్యాప్తంగా బీఆర్ఎస్ కార్యకర్తలను పోలీసులు ముందస్తు అరెస్ట్ చేస్తున్నారు. కన్నెపల్లి పంప్ హౌస్ లోపలికి ప్రవేశించేందుకు అనుమతి లేదని పోలీసులు స్పష్టం చేశారు. కేటీఆర్ గమ్యాన్ని చేరుకుంటారా లేక మార్గంలో అడ్డుకుంటారా అనే సందిగ్ధత నెలకొంది.