TG20 లీగ్‌పై HCA vs TCA మధ్య మరో వివాదం - HCA నుండి గట్టి కౌంటర్

TG20 లీగ్ నిర్వహణపై తెలంగాణ క్రికెట్ అసోసియేషన్ (TCA) మరియు హైదరాబాద్ క్రికెట్ అసోసియేషన్ (HCA) మధ్య వివాదం మరో దశకు చేరింది. TCA చేసిన ఆరోపణలకు HCA స్పోక్స్‌పర్సన్ శేషనారాయణ గట్టిగా కౌంటర్ ఇచ్చారు.

TCA కి చట్టబద్ధత లేదని, BCCI గుర్తింపు పొందిన HCA ఉన్నప్పుడు TCA కి అవకాశమే లేదని శేషనారాయణ స్పష్టం చేశారు. నకిలీ క్రికెట్ అసోసియేషన్లు మోసగాళ్ళపై ఉప్పల్ పోలీస్ స్టేషన్‌లో ఫిర్యాదు చేశామని, న్యాయపరమైన చర్యలు కూడా తీసుకుంటామని హెచ్చరించారు. అమాయక ఇన్వెస్టర్లను మరియు క్రికెటర్లను మోసం చేసి డబ్బు వసూలు చేసేవారిపై చట్టపరంగా చర్యలు తీసుకుంటామని పేర్కొన్నారు.

TG20 గవర్నింగ్ కౌన్సిల్ చైర్మన్ ఆగమరావు మాట్లాడుతూ, TG20 కి ప్రేక్షకుల నుండి అద్భుతమైన స్పందన వస్తుందని, IPL తరహాలో ఈ లీగ్ నడుస్తుందని చెప్పారు. దేశం మొత్తం TG20 వైపు చూస్తుందని, రెండు మూడు సంవత్సరాల్లో తెలంగాణ నుండి స్టార్ క్రికెటర్లు పుట్టుకొస్తారని పేర్కొన్నారు. 160 మంది యువ క్రికెటర్లకు సువర్ణ అవకాశం ఇవ్వడం గొప్ప పరిణామమని అన్నారు.

HCA జనరల్ సెక్రెటరీ మన్నె జీవన్ రెడ్డి మాట్లాడుతూ, జూలై 12న జరిగే ఫైనల్ మ్యాచ్‌కు గవర్నర్‌తో పాటు CM రేవంత్ రెడ్డిని ఆహ్వానించనున్నట్లు తెలిపారు.

HCA ఆపరేషన్స్ హెడ్ అంబటి రాయుడు గ్రామీణ క్రికెట్ అభివృద్ధిపై కొత్త యాక్షన్ ప్లాన్ ప్రకటించారు. సూర్యాపేట, జగిత్యాల, నాగర్‌కర్నూల్, సిద్దిపేటలో సెంటర్ ఆఫ్ ఎక్సలెన్స్ పేరుతో నాలుగు అత్యాధునిక అకాడమీలు నిర్మిస్తారు. BCCI స్టాండర్డ్స్ తో 15 ఎకరాల విస్తీర్ణంలో అకాడమీలు, జిల్లాల్లో ఏడు నుండి ఎనిమిది ఎకరాల్లో గ్రౌండ్లు నిర్మిస్తారు. అదిలాబాద్, కరీంనగర్, ఖమ్మం, మహబూబ్‌నగర్, మెదక్, నల్గొండ, నిజామాబాద్, వరంగల్ జిల్లాలు గుర్తించబడ్డాయి. ఈ ప్రణాళికతో 600 మంది కొత్త ఆటగాళ్ళు లీగ్ సిస్టమ్‌లోకి వస్తారని అంబటి రాయుడు వెల్లడించారు.