టీజీఎస్ఆర్టీసీ ఎలక్ట్రిక్ ఆటో సేవలు: బస్ టికెట్‌తోనే ఆటో బుకింగ్ సౌకర్యం

తెలంగాణ రాష్ట్ర రోడ్డు రవాణా సంస్థ (టీజీఎస్ఆర్టీసీ) ప్రయాణికుల కోసం కొత్త ఎలక్ట్రిక్ ఆటో సేవలను ప్రారంభించనుంది. ఫస్ట్ మైల్ నుంచి లాస్ట్ మైల్ కనెక్టివిటీ కల్పించే ఈ సేవలో ప్రయాణికులు బస్ టికెట్‌తో పాటు ముందుగానే ఆటోను కూడా బుక్ చేసుకునే అవకాశం ఉంటుంది.

ప్రాథమిక దశలో ఈ సేవను గ్రేటర్ హైదరాబాద్ మునిసిపల్ కార్పొరేషన్ (జీహెచ్ఎంసీ) పరిధిలో అందుబాటులోకి తీసుకురావడానికి టీజీఎస్ఆర్టీసీ ప్రణాళిక సిద్ధం చేస్తోంది. అనంతరం వరంగల్, కరీంనగర్ తదితర జిల్లాలకు ఈ సేవల్ని విస్తరించాలని భావిస్తోంది.

రోజూ బస్సులో ప్రయాణించే ఉద్యోగులకు, ముఖ్యంగా హైదరాబాద్‌లో నివసించేవారికి ఈ సౌకర్యం ఎంతగానో ఉపయోగపడుతుందని, సమయం ఆదా అవుతుందని టీజీఎస్ఆర్టీసీ పేర్కొంది. సురక్షిత ప్రయాణంతో పాటు ముందస్తు బుకింగ్ ద్వారా ప్రయాణికులు ఒత్తిడి లేకుండా గమ్యం చేరుకోవచ్చని తెలిపింది.