హైదరాబాద్లో బస్సు ఎక్కే ముందే టికెట్ బుకింగ్; టీజీఎస్ఆర్టీసీ కొత్త డిజిటల్ విధానం
తెలంగాణ ఆర్టీసీ (టీజీఎస్ఆర్టీసీ) హైదరాబాద్లో సిటీ బస్సుల్లో ప్రయాణించే వారికి కొత్త డిజిటల్ టికెట్ వ్యవస్థను అందుబాటులోకి తీసుకురాబోతోంది. మెట్రో రైల్ తరహాలో బస్సు ఎక్కే ముందే టికెట్ బుక్ చేసుకునే సౌలభ్యం ఇది. ప్రస్తుతం ఉన్న టీజీఎస్ఆర్టీసీ యాప్లో ఈ ఫీచర్ను చేర్చనున్నారు. దీంతో పాటు విద్యార్థులకు డిజిటల్ బస్ పాసులు జారీ చేయాలని నిర్ణయించారు.
గ్రేటర్ హైదరాబాద్లో 3200కి పైగా బస్సులు నడుస్తున్నాయి. రోజూ సుమారు 26 లక్షల మంది ఈ బస్సుల్లో ప్రయాణిస్తున్నారు. వీరిలో 70% మంది మహాలక్ష్మి ఉచిత ప్రయాణ పథకం లబ్ధిదారులు. టీజీఎస్ఆర్టీసీకి రోజుకు రూ.6.50 కోట్ల ఆదాయం వస్తుండగా, ప్రస్తుతం 23% డిజిటల్ చెల్లింపుల ద్వారా జరుగుతోంది. కొత్త విధానంతో డిజిటల్ లావాదేవీలు మరింత పెరగనున్నాయి.
ఉదయం, సాయంత్రం వేళల్లో బస్సుల్లో తీవ్ర రద్దీ ఉంటుంది. టికెట్ కోసం ప్రయాణికులు ఇబ్బందులు పడుతుంటారు. కొన్నిసార్లు డిజిటల్ చెల్లింపుల్లో సాంకేతిక సమస్యలు రావడం వల్ల టికెట్ జారీ ఆలస్యమవుతుంది. బస్సు షెడ్యూల్పై ప్రభావం పడుతోంది. ప్రయాణానికి ముందే టికెట్ తీసుకోవడం ద్వారా ఇటు కండక్టర్లకు, అటు ప్రయాణికులకు ఇబ్బందులు తప్పుతాయి.
కొత్త వ్యవస్థలో ప్రయాణికులు యాప్లో తమ బోర్డింగ్ స్టాప్, గమ్యస్థానం ఎంచుకోవాలి. యూపీఐ లేదా కార్డ్ల ద్వారా చెల్లించి ముందే టికెట్ కొనుగోలు చేయవచ్చు. బస్సును లైవ్గా ట్రాక్ చేస్తూ టికెట్లో చూపిన సమయం ఆధారంగా ప్రయాణ ప్లాన్ చేసుకోవచ్చు. ప్రస్తుతం యాప్లో సిటీ ఆర్డినరీ, మెట్రో ఎక్స్ప్రెస్, మెట్రో డీలక్స్, పుష్పక్ బస్సుల టికెట్లు అందుబాటులో ఉన్నాయి.
ఇక విద్యార్థులకు డిజిటల్ బస్ పాసులు జారీ చేయాలని టీజీఎస్ఆర్టీసీ నిర్ణయించింది. ఈ కొత్త విధానం త్వరలో అమల్లోకి రానుంది.
వార్త ఆధారాలు: పబ్లిక్ న్యూస్ బ్రాడ్కాస్ట్లు, అధికారిక అప్డేట్లు, ఉషా కిరణం ఎడిటోరియల్ ప్రమాణాలు.
సవరణల కోసం సంప్రదించండి: help@ushakiranam.com
