హైదరాబాద్ - బెంగళూరు ప్రయాణికులకు టీజీఎస్ఆర్టీసీ ఉచిత పుష్పక్ ఫీడర్ బస్సు సేవలు

హైదరాబాద్-బెంగళూరు మార్గంలో ప్రయాణించే ప్రయాణికుల కోసం తెలంగాణ రాష్ట్ర రోడ్డు రవాణా సంస్థ (టీజీఎస్ఆర్టీసీ) కొత్త ఉచిత ఫీడర్ బస్సు సేవలను ప్రకటించింది.

బెంగళూరుకు సూపర్ లగ్జరీ బస్సు టికెట్ బుక్ చేసుకుని, శంషాబాద్ ఎయిర్పోర్ట్ ట్రాఫిక్ పోలీస్ స్టేషన్ను బోర్డింగ్ పాయింట్గా ఎంపిక చేసుకున్న ప్రయాణికులకు మాత్రమే ఈ ఉచిత సౌకర్యం వర్తిస్తుంది. టీజీఎస్ఆర్టీసీ ఎండీ నాగిరెడ్డి ఈ మేరకు వివరాలు వెల్లడించారు.

ఈ కొత్త విధానం ప్రకారం, హైదరాబాద్ నగరంలోని జూబ్లీ బస్ స్టేషన్, సికింద్రాబాద్, మియాపూర్, గచ్చిబౌలి, లింగంపల్లి, మెహదీపట్నం తదితర ప్రాంతాల నుంచి ప్రతిరోజు సాయంత్రం 6 గంటల నుంచి ఫీడర్ సేవలు అందుబాటులో ఉంటాయి. ప్రయాణికులు ఆర్టీసీ అధికారిక వెబ్‌సైట్ లేదా యాప్ ద్వారా టికెట్ బుక్ చేసుకుని, ప్రయాణం రోజున ఆ టికెట్ చూపించి ఉచితంగా పుష్పక్ ఏసీ ఫీడర్ బస్సులో ప్రయాణించవచ్చు.

నగరంలో పెరిగిపోతున్న ట్రాఫిక్ రద్దీని దృష్టిలో పెట్టుకుని, ముఖ్యంగా పశ్చిమ, ఉత్తర ప్రాంతాల ప్రయాణికులు సమయం ఆదా చేసేలా ఈ సేవలను ప్రారంభించినట్లు అధికారులు తెలిపారు. ఫీడర్ బస్సులు ప్రతి 10 నిమిషాలకు ఒకటి చొప్పున అందుబాటులో ఉంటాయి.

తెలంగాణలో మహిళలకు ఉచిత బస్సు సౌకర్యం ఇప్పటికే ఉండగా, ఈ ఫీడర్ సేవ ద్వారా పురుషులు కూడా ఉచిత ప్రయాణం చేయవచ్చు. బెంగళూరు వెళ్లే ప్రయాణికులు ఈ సదుపాయాన్ని సద్వినియోగం చేసుకోవాలని అధికారులు సూచించారు.