బోనాలు పండుగపై మంత్రి తలసాని శ్రీనివాస్ యాదవ్ వ్యాఖ్యలు

బోనాలు పండుగ సందర్భంగా మంత్రి తలసాని శ్రీనివాస్ యాదవ్ తమ కుటుంబ భక్తి సంప్రదాయాన్ని వివరించారు. తమ కులదైవం అమ్మవారేనని, తరతరాలుగా బోనాలు ఉత్సవంలో పాల్గొంటున్నామని ఆయన తెలిపారు.

ఉమ్మడి ఆంధ్రప్రదేశ్‌లో 50 ఏళ్లుగా బోనాలను రాష్ట్ర పండుగగా ప్రకటించాలనే డిమాండ్ ఉండేదని, తెలంగాణ రాష్ట్రం ఏర్పడిన తొలి ఏడాది ముఖ్యమంత్రి కేసీఆర్ దీన్ని రాష్ట్ర పండుగగా ప్రకటించారని గుర్తు చేశారు.

ఉదయం బోనం సమర్పణ, మధ్యాహ్నం తొట్టెల ఊరేగింపు, సాయంత్రం పలారం బండ్ల ఊరేగింపు ఉంటాయని, ఈ కార్యక్రమాలు మరుసటి రోజు ఉదయం వరకు కొనసాగుతాయని వివరించారు. రాజకీయాలకు అతీతంగా వివిధ రాష్ట్రాల నుంచి భక్తులు వస్తారని చెప్పారు.

వర్షాభావంతో రైతులు ఇబ్బందులు పడుతున్న నేపథ్యంలో బల్కంపేట ఎల్లమ్మ వారి కళ్యాణం రోజు వర్షాలు కావాలని ప్రార్థించామని, ఈసారి కూడా అమ్మవారిని మంచి వర్షాలు, పంటలు సుభిక్షంగా ఉండాలని కోరుకుంటున్నామని ఆయన తెలిపారు. భక్తులకు సాఫీగా దర్శనం కల్పించేందుకు నెల రోజులుగా సమన్వయ పాత్ర పోషించానని చెప్పారు.