మూడు నెలల రేషన్ పంపిణీ తెలంగాణలో నేటి నుంచి ప్రారంభం; రాష్ట్రవ్యాప్తంగా సరఫరా

తెలంగాణలో మూడు నెలల రేషన్ బియ్యం పంపిణీ నేటి నుంచి ప్రారంభమైంది. ఈ పంపిణీ ఈ నెల 31 వరకు కొనసాగుతుంది. ఎల్‌-నీనో ప్రభావం, వేసవి తీవ్రత, దేశవ్యాప్తంగా ఎండల తీవ్రత నేపథ్యంలో కేంద్ర ప్రభుత్వం ఒకేసారి మూడు నెలల రేషన్ కోటా ఇవ్వాలని ఆదేశించింది. దీనికి రాష్ట్ర పౌరసరపరాల శాఖ అన్ని ఏర్పాట్లు పూర్తి చేసింది.

హైదరాబాద్ జిల్లా చీఫ్ రేషనింగ్ ఆఫీసర్ రాజిరెడ్డి మాట్లాడుతూ, రాష్ట్రవ్యాప్తంగా 1.05 కోట్ల రేషన్ కార్డులున్నాయని, 3.42 కోట్ల మంది సభ్యులకు బియ్యం, గోధుమలు పంపిణీ చేస్తామని తెలిపారు. ఒక్కో వ్యక్తికి 6 కిలోల బియ్యం చొప్పున మూడు నెలల కోటా ఇస్తామని, అలాగే కార్డుదారుకు 5 కిలోల గోధుమలు అదనంగా ఇవ్వనున్నట్లు వివరించారు. హైదరాబాద్ జిల్లా పరిధిలో 8,43,000 కార్డులుండగా, 32.29 లక్షల మందికి బియ్యం, 7,500 మెట్రిక్ టన్నుల గోధుమలు పంపిణీ చేయనున్నారు.

ఇంతకుముందు ఏప్రిల్‌లో కూడా మూడు నెలల రేషన్ ఇచ్చిన అనుభవం ఉందని, ఆ సమయంలో ఎదురైన సమస్యల ఆధారంగా ఈసారి మెరుగైన ఏర్పాట్లు చేశామని రాజిరెడ్డి చెప్పారు. చౌకదర దుకాణాల్లో స్థలం సరిపోని చోట్ల అదనపు ప్రాంగణాలకు అనుమతి ఇచ్చామని, రవాణా సదుపాయాలను పటిష్టం చేశామని తెలియజేశారు. హైదరాబాద్ నగరంలో 653 షాపుల్లో నేడు ఉదయం 9 గంటల నుంచి పంపిణీ మొదలైంది.

ఈకేవైసీ చేయించుకోకపోయినా రేషన్ అందుతుందని, ఎలాంటి భయాందోళనలు అవసరం లేదని రాజిరెడ్డి స్పష్టం చేశారు. అయితే అందరూ వీలైనంత త్వరగా ఈకేవైసీ ప్రక్రియ పూర్తి చేయించుకోవాలని కోరారు. రేషన్ కార్డు రద్దు లేదా నిలిపివేత జరుగుతుందన్న వార్తలు అవాస్తవమని తెలిపారు.