తుంగభద్ర డ్యామ్ వద్ద మూడు రాష్ట్రాల CM లు జల వివాదాలపై చర్చ; వెనజువేలా భూకంపంలో 188 మంది మృతి

తుంగభద్ర డ్యామ్ గేట్ల ప్రారంభోత్సవం సందర్భంగా ఆంధ్రప్రదేశ్, తెలంగాణ, కర్ణాటక ముఖ్యమంత్రులు చంద్రబాబు, రేవంత్ రెడ్డి, డికే శివకుమార్ మరియు కేంద్ర జలశక్తి మంత్రి CR పాటీల్ సమక్షంలో సుమారు 45 నిమిషాల పాటు జల వివాదాలపై కీలక చర్చలు జరిపారు. తుంగభద్రలో ప్రత్యేకించి RDS లో తెలంగాణకు న్యాయమైన వాటా వచ్చేలా చూడడానికి నిపుణుల కమిటీ ఏర్పాటు చేయాలని నిర్ణయించారు. తెలంగాణకు ప్రయోజనం కలిగించే ఏ ప్రతిపాదన పైనైనా చర్చించడానికి అభ్యంతరం లేదని రేవంత్ రెడ్డి స్పష్టం చేశారు. పోలవరం నల్లమల సాగర్ ప్రతిపాదనకు అంగీకరించాలని చంద్రబాబు పేర్కొన్నారు. పాలమూరు రంగారెడ్డి డిండి ఎత్తిపోతలకు NOC ఇవ్వాలని రేవంత్ కోరారు.

తుంగభద్ర గేట్ల మార్పు వల్ల తెలంగాణకు 15.99 TMC నీరు ఎలా వస్తుందని మాజీ మంత్రి హరీష్ రావు ప్రశ్నించారు. ఆంధ్రప్రదేశ్ కర్ణాటక నుంచి కీలక అంశాలపై హామీలు లేకపోతే ఇది కేవలం రాజకీయ ప్రచారమేనని ఆక్షేపించారు.

ప్రైవేట్ పాఠశాలల్లో అధిక ఫీజుల నియంత్రణకు ఇతర రాష్ట్రాలు అవలంబిస్తున్న విధానాలను అధ్యయనం చేయాలని ఏపీ విద్యాశాఖ మంత్రి నారా లోకేష్ అధికారులను ఆదేశించారు. ITI లలో AI ల్యాబ్ లు ఏర్పాటుకు చర్యలు తీసుకోవాలని సూచించారు. PM సేతు పథకం కింద ఏపీకి ఐదు క్లస్టర్లు మంజూరయ్యాయని వెల్లడించారు.

తిరుమలలో TTD మరియు రాష్ట్ర FSSAI సంయుక్తంగా నిర్మించిన ఫుడ్ సేఫ్టీ ల్యాబ్ అందుబాటులోకి వచ్చింది. 25 కోట్లతో నిర్మించిన ఈ ల్యాబ్ ద్వారా అన్నప్రసాదాలు మరియు నీటిని పరీక్షించే అవకాశం కలిగింది.

కేంద్ర ప్రభుత్వ గ్లోబల్ స్టాండర్డ్ టూరిస్ట్ డెస్టినేషన్ పథకం కింద వికారాబాద్, నాగార్జున సాగర్, యాదగిరి గుట్ట ప్రాంతాలను ప్రతిపాదించాలని తెలంగాణ ప్రభుత్వం నిర్ణయించింది. ఎంపికైన ప్రతి ప్రాంతానికి గరిష్టంగా 500 కోట్ల రూపాయలు అందించనున్నారు.

వెనజువేలాలో జంట భూకంపాలతో మృతుల సంఖ్య 188 కి పెరిగింది. 1500 మందికి పైగా గాయపడ్డారు. సిథిలాల కింద 200 మందికి పైగా చిక్కుకుని ఉంటారని అంచనా వేస్తున్నారు. కరాకస్ విమానాశ్రయం మూసివేయడంతో సహాయం చేరడానికి ఆలస్యమవుతుంది. వెనజువేలాకు సాయం చేయడానికి సిద్ధంగా ఉన్నామని PM నరేంద్ర మోదీ ప్రకటించారు.

పశ్చిమాసియాలో ఉద్రిక్తతలు తగ్గిన నేపథ్యంలో వాణిజ్య LPG పై విధించిన ఆంక్షలను కేంద్రం ఎత్తివేసింది. యుద్ధానికి ముందున్న స్థాయికి సరఫరా పునరుద్ధరించింది.

పల్నాడు జిల్లాలో ఘోర రోడ్డు ప్రమాదంలో నలుగురు మృతి చెందారు. మాచల నగరవనం వద్ద ఆగి ఉన్న లారీని తుఫాన్ వాహనం ఢీ కొట్టడంతో హైదరాబాద్కు చెందిన ప్రయాణికులు దుర్మరణం పాలయ్యారు.

శంషాబాద్ విమానాశ్రయంలో కస్టమ్స్ అధికారులు కౌలాలంపూర్ నుంచి వచ్చిన ప్రయాణికుని వద్ద 2.271 కిలోల బంగారాన్ని స్వాధీనం చేసుకున్నారు. 3.36 కోట్ల రూపాయల విలువైన బంగారాన్ని దాచిపెట్టి అక్రమంగా తరలించే యత్నం చేసినట్లు తేల్చారు.