ఎల్నినోపై ప్రత్యేక యాక్షన్ ప్లాన్, తక్కువ నీటి పంటల వైపు వెళ్లాలని రైతులకు సూచన: మంత్రి తుమ్మల నాగేశ్వరరావు

తెలంగాణ వ్యవసాయ శాఖ మంత్రి తుమ్మల నాగేశ్వరరావు ఎల్నినో పరిస్థితులను ఎదుర్కొనేందుకు ప్రభుత్వం ప్రత్యేక యాక్షన్ ప్లాన్ సిద్ధం చేస్తోందని తెలిపారు. రోజువారీ సమీక్షలు నిర్వహిస్తూ, మూడు దశల్లో రైతుల కోసం ప్రణాళికలు రూపొందిస్తున్నామని చెప్పారు.

కరీంనగర్, నిజామాబాద్, ఆదిలాబాద్ జిల్లాల్లో వర్షాభావ పరిస్థితుల కారణంగా రైతులు రెండుసార్లు విత్తనాలు నాటవలసిన పరిస్థితులు ఉన్నాయన్నారు. తగినంత వర్షపాతం లేకుండా త్వరపడి విత్తనాలు వేయొద్దని రైతులకు ఇప్పటికే సూచించామని తెలిపారు.

వాతావరణ కేంద్రాల సమాచారం ఆధారంగా ప్రతి 15 రోజులకు పరిస్థితిని సమీక్షించి, రోజు వారీగా వర్షపాతం, భూగర్భ జలాల వివరాలు రైతులకు అందించే యంత్రాంగాన్ని సిద్ధం చేశామన్నారు. డ్యామ్స్ కింద, బోర్వెల్స్, లిఫ్ట్ ఇరిగేషన్ల పరిధిలో వరి సాగును తగ్గించుకొని తక్కువ నీటితో పండే పంటల వైపు వెళ్లాలని సూచించారు.

రైతులకు అవసరమైన విత్తనాలు సరఫరా చేయడం, శాస్త్రీయ సలహాలు ఇవ్వడం కోసం ప్రభుత్వం చర్యలు తీసుకుంటోందన్నారు. ఆయిల్ పామ్, హార్టికల్చర్ లాంటి పంటలను ప్రోత్సహించడం ద్వారా కరువును ఎదుర్కోవచ్చని తుమ్మల నాగేశ్వరరావు వివరించారు.