సాధారణ టికెట్ రేట్లతో సినిమాలు విజయం సాధిస్తుండటంతో టికెట్ ధరలపై చర్చ తిరిగి తెరపైకి

టికెట్ రేట్లపై చర్చ మరోసారి మొదలైంది. ఇటీవల సాధారణ ధరలతో విడుదలైన కొన్ని సినిమాలు మంచి వసూళ్లు రాబట్టడమే దీనికి కారణం.

కొరియన్ కనకరాజు, వీరభద్రుడు, లెనిన్, మా ఇంటి బంగారం, చెన్నై లవ్ స్టోరీ వంటి చిత్రాలు థియేటర్లలో రాణించాయి. వీటి టికెట్ రేట్లు సింగిల్ స్క్రీన్లలో ₹100–₹150, మల్టీప్లెక్స్లలో ₹200–₹250 మధ్య ఉండడం ప్రేక్షకులను ఆకట్టుకుంది. కంటెంట్ సగటు స్థాయిలో ఉన్నా సరే, రేట్లు అందుబాటులో ఉంటే ఆడియెన్స్ థియేటర్ వైపు వస్తున్నారు.

సినీ నటుడు రామ్ చరణ్ ఈ అంశంపై స్పందించారు. భారతదేశంలో సినిమానే అత్యంత చౌకైన వినోద సాధనమని, అయితే థియేటర్లలో అధికంగా ఉండే పాప్కార్న్ ధరల కారణంగా సాధారణ కుటుంబాలు సినిమాలకు దూరమవుతున్నాయని ఆయన అన్నారు. వాటిని తగ్గించాలని సూచించారు. నిర్మాత నాగవంశి కూడా ఇదే అభిప్రాయం వ్యక్తం చేశారు. టికెట్ రేట్లు కాకుండా పాప్కార్న్ ధరలే సమస్య అని పేర్కొన్నారు.

టికెట్ రేట్లు పెంచిన ప్రతిసారీ విమర్శలు వస్తుండగా, సాధారణ రేట్లతో వచ్చిన సినిమాలు ప్రేక్షకులను బాగా ఆకర్షిస్తున్నాయి. ఈ నేపథ్యంలో నిర్మాతలు రేట్ల విషయంలో ఎలాంటి నిర్ణయం తీసుకుంటారో చూడాలి.