ఏలూరు జిల్లాలో పెద్దపులి కదలికలు: అటవీ శాఖ హై అలర్ట్

పోలవరం జిల్లా నుండి ఒక పెద్దపులి ఏలూరు జిల్లాలోకి ప్రవేశించినట్లు అటవీ శాఖ అధికారులు ధృవీకరించారు. పులికి అమర్చిన రేడియో కాలర్ సంకేతాల ద్వారా ఈ విషయం తెలిసింది.

దేవీపట్నం మండలం కొండ మొదలు వద్ద గోదావరి నది దాటిన పులి, ఏలూరు జిల్లా పోలవరం మండలం చిరువాక ప్రాంతంలో సంచరిస్తున్నట్లు గుర్తించారు. గత ఆరు రోజులుగా జాడ లేకపోవడంతో, కేరళ బృందం సాయంతో డ్రోన్లు ఉపయోగించి సెర్చ్ ఆపరేషన్ నిర్వహించారు.

గడ్డపల్లి, గిన్నెపల్లి, దరవాడ, చిలకలూరు, తంగేడుకొండ గ్రామాల ప్రజలు రాత్రిపూట ఒంటరిగా బయటకు రావొద్దని, పశువుల కొట్టాల వద్ద లైటింగ్ ఏర్పాటు చేసుకోవాలని అధికారులు హెచ్చరించారు. నదీ తీరాల్లో చేపల వేట, పశువుల మేత కూడా నిషేధించారు. పాపికొండల శివాలయం వైపు వెళ్లే పర్యాటక బోట్లను మూడు రోజుల పాటు నియంత్రించాలని డీఎఫ్ఓ కార్యాలయం లేఖ పంపింది.

ఇది ఏలూరు జిల్లాలోకి పులి ప్రవేశించడం మూడోసారి. ప్రస్తుతం అది పాపికొండల అటవి ప్రాంత సమీపంలో ఉన్నట్లు అధికారులు తెలిపారు. పులిని సురక్షితంగా పట్టుకుని తిరిగి అడవిలోకి పంపేందుకు రెండు జిల్లాల్లో ప్రత్యేక బృందాలు, బోన్లు, వెటర్నరీ బృందాలు సిద్ధంగా ఉన్నాయి.