పోలవరం జిల్లాలో పులి ట్రాకర్ సిగ్నల్ నిలిచిపోయింది

పోలవరం జిల్లా దేవీపట్నం మండలంలో సంచరిస్తున్న పులికి అమర్చిన ట్రాకర్ నుంచి రెండు రోజులుగా ఎలాంటి సిగ్నల్స్ అందడం లేదు. దీంతో ఆ పులి ఆచూకీపై అధికారులు ఆందోళన చెందుతున్నారు. చివరిసారిగా మంటూరు ప్రాంతంలో సిగ్నల్ అందింది. ఆ తర్వాత ట్రాకర్ పనిచేయడం లేదు.

పులి ఇప్పటికీ పోలవరం అటవీ ప్రాంతంలోనే ఉందా, గోదావరి నది దాటి ఏలూరు జిల్లా వైపు వెళ్ళిందా, లేదా ట్రాకర్లో సాంకేతిక లోపం తలెత్తిందా అని అధికారులు పరిశీలిస్తున్నారు. అలాగే వేటగాళ్ల బారిన పడే అవకాశం కూడా ఉన్నట్లు అనుమానిస్తున్నారు.

పులి జాడ కోసం అటవీ శాఖ ప్రత్యేక బృందాలు అటవీ ప్రాంతంలో గాలింపు కొనసాగిస్తున్నాయి. కేరళ నుంచి ప్రత్యేక నిపుణుల బృందం భారీ డ్రోన్ కెమెరాతో వచ్చింది. దండంగి గ్రామ సమీపంలో డీఎఫ్ఓ రామచంద్రరావు ఆధ్వర్యంలో సిబ్బందికి డ్రోన్ వినియోగంపై శిక్షణ ఇచ్చారు. డ్రోన్ సాయంతో దండంగి కాలువ, తోయేరు మెట్ట ప్రాంతాలను పరిశీలించారు.

పులిని గుర్తించేంత వరకు స్థానిక ప్రజలు అప్రమత్తంగా ఉండాలని అధికారులు సూచించారు. ప్రజల భద్రతకు ప్రాధాన్యత ఇస్తున్నామని అటవీ శాఖ తెలిపింది.