తిరుమలలో సర్వదర్శనానికి 24 గంటలకు పైగా సమయం

తిరుమల శ్రీ వేంకటేశ్వర స్వామి వారి సర్వదర్శనానికి టోకెన్లు లేని సామాన్య భక్తులకు 24 గంటలకు పైగా సమయం పడుతోందని తితిదే అధికారులు తెలిపారు. వారాంతం కావడం, వేసవి సెలవులు ముగుస్తుండటంతో భక్తులు బారులు తీరారు. వైకుంఠం క్యూ కాంప్లెక్స్ నిండిపోయి, బయట 3 కిలోమీటర్ల మేరకు క్యూ లైన్లు విస్తరించాయి.

ప్రత్యేక ప్రవేశ దర్శనానికి 6 గంటలు, సర్వదర్శనం టోకెన్ పొందిన భక్తులకు 8 గంటల సమయం పడుతోందని తెలిపారు. ఆంధ్రప్రదేశ్, తెలంగాణతో పాటు కర్ణాటక, తమిళనాడు నుండి వేలాది మంది భక్తులు తరలి వచ్చారు.

రద్దీ పెరగడంతో వాహనాల రద్దీ కూడా పెరిగింది. భక్తులకు అసౌకర్యం కలగకుండా చూసేందుకు తితిదే అధికారులు అప్రమత్తంగా ఉండి ఏర్పాట్లు చేస్తున్నారు. వివిధ విభాగాల సమన్వయానికి ఉన్నతాధికారులు కృషి చేస్తున్నారు.