తిరుమలలో భారీ రద్దీ: ఒక్క రోజే 97,561 మంది దర్శనం

తిరుమలలో భక్తుల రద్దీ భారీగా పెరిగింది. వైకుంఠం క్యూ కాంప్లెక్స్ కంపార్ట్‌మెంట్లు అన్నీ నిండిపోయాయి. నారాయణగిరి ఉద్యానవనం నుండి ఆక్టోపస్ బిల్డింగ్ వరకు భక్తులు క్యూలో వేచి ఉన్నారు. token లేని భక్తులకు సర్వదర్శనానికి 30 గంటలకు పైగా సమయం పడుతోంది.

ఒక్క రోజే 97,561 మంది భక్తులు శ్రీవారిని దర్శించుకున్నారు. 57,780 మంది తలనీలాలు సమర్పించారు. హుండీ ఆదాయం ₹3.76 కోట్లుగా అధికారులు తెలిపారు.

దర్శన నిర్వహణను మెరుగుపరచేందుకు TTD Integrated Command Control Centre ద్వారా క్యూ లైన్లను పర్యవేక్షిస్తోంది. దీని వల్ల రోజుకు అదనంగా 15,000 మంది భక్తులకు దర్శన భాగ్యం కల్పిస్తున్నారు. గురువారం 79,000 మంది, శుక్రవారం 87,000 మంది భక్తులు దర్శనం చేసుకున్నారు. గత వారంలో మొత్తం 6 లక్షల మంది భక్తులకు దర్శన భాగ్యం కల్పించినట్లు TTD తెలిపింది.

శని, ఆదివారాలలో సుమారు 90,000 మంది, సోమ-బుధవారాలలో 85,000 మంది, గురు-శుక్రవారాలలో 65,000 నుండి 70,000 మంది భక్తులు వస్తున్నారు. TTD మరో కీలక నిర్ణయం తీసుకుంది. అభిషేక సేవ సమయంలో సామాన్య భక్తులు కూడా 5,850 మంది దర్శనం చేసుకోవచ్చు.