తిరుమలలో భక్తుల రద్దీ; వారాంతంలో సర్వదర్శనానికి 24 గంటలకుపైగా సమయం

తిరుమల శ్రీ వేంకటేశ్వర స్వామి వారి ఆలయంలో భక్తుల రద్దీ కొనసాగుతోంది. మంగళవారం 84 వేల మంది భక్తులు స్వామి వారిని దర్శించుకున్నారు. ఇంతకు ముందు నాలుగు రోజులు వరుసగా 90 వేల మందికి పైగా దర్శనం లభించింది.

బుధవారం కూడా భారీగా భక్తులు తరలివస్తున్నారు. గురువారం ప్రత్యేక కైంకర్యాల నేపథ్యంలో రద్దీ మరింత పెరిగే అవకాశం ఉంది. ఈ వారాంతంలో టోకెన్లు లేని భక్తులకు సర్వదర్శనం కోసం 24 గంటలకు పైగా సమయం పట్టవచ్చని అంచనా.

టీటీడీ అధికారులు అప్రమత్తమై, కమాండ్ కంట్రోల్ సాయంతో క్యూ లైన్ల వేగం పెంచే ప్రయత్నం చేస్తున్నారు. ప్రస్తుతం వైకుంఠం క్యూ కాంప్లెక్స్ నిండిపోయి, భక్తుల వరుసలు శిలాతోరణం వరకు విస్తరించాయి.