తిరుమల ఏడవ మైలు వద్ద ఆంజనేయస్వామి విగ్రహం చోరీ కేసు ఛేదించిన పోలీసులు

తిరుమలలో ఏడవ మైలు వద్ద ఆంజనేయస్వామి చిన్న విగ్రహం చోరీ కేసును పోలీసులు ఛేదించారు. విశాఖపట్నానికి చెందిన యశ్వంత్ కుమార్ అనే వ్యక్తిని నిందితుడిగా గుర్తించి అరెస్ట్ చేశారు.

తిరుపతి ఏఎస్పీ రవి మనోహరాచారి ఈ కేసు వివరాలు వెల్లడించారు. దర్యాప్తు కోసం 15 ప్రత్యేక బృందాలు ఏర్పాటు చేసినట్లు ఆయన తెలిపారు. నిందితుడు బీటెక్ చదివి, ఉద్యోగం రాకపోవడంతో మానసిక ఒత్తిడికి లోనయ్యాడు. గత కొంతకాలంగా విజయనగరం జిల్లా గోర్ల మండలంలోని ఓ మఠంలో ఆధ్యాత్మిక జీవితం గడుపుతున్నాడు.

ఈ నెల 21న తిరుమల నుంచి తిరుపతికి జీపులో వెళ్తుండగా, డ్రైవర్‌కు ఏడవ మైలు వద్ద గల పెద్ద ఆంజనేయస్వామి విగ్రహం దగ్గర ఆపమని చెప్పి, అక్కడ ఉన్న చిన్న విగ్రహాన్ని తీసుకుని వెళ్లిపోయాడు. అతడు విశాఖపట్నం వెళ్తుండగా పోలీసులు అదుపులోకి తీసుకున్నారు.

జీప్ డ్రైవర్ ఇచ్చిన సమాచారం, సీసీటీవీ ఫుటేజీ, ఇతర సాంకేతిక ఆధారాలతో నిందితుడిని గుర్తించామని ఏఎస్పీ తెలిపారు. వీడియోలో లేత పసుపు దుస్తులు, గోవిందమాల ధరించిన వ్యక్తి విగ్రహం తీసుకెళ్లడం కనిపించింది.