తిరుమలలో భక్తుల రద్దీ కొనసాగింపు; హుండీ ఆదాయం ₹3.60 కోట్లు

తిరుమల శ్రీ వేంకటేశ్వర స్వామి ఆలయంలో భక్తుల రద్దీ తీవ్రంగా కొనసాగుతోంది. సర్వ దర్శనానికి 24 గంటల సమయం పడుతోంది. నిన్న (శనివారం) 92,830 మంది భక్తులు స్వామివారిని దర్శించుకున్నారు. 48,987 మంది భక్తులు తలనీలాలు సమర్పించారు. హుండీ ద్వారా ₹3.60 కోట్ల ఆదాయం వచ్చిందని టీటీడీ అధికారులు తెలిపారు.

వేసవి సెలవులు ముగిసి పాఠశాలలు ప్రారంభమైనప్పటికీ, వారాంతం కావడంతో రద్దీ అధికంగా ఉంది. క్యూ లైన్లు నిండిపోయి భక్తులు అక్టోపస్ భవనం వరకు వేచి ఉండాల్సి వస్తోంది. వృద్ధులు, మహిళలు, చిన్నపిల్లలు తోపులాటల్లో తొక్కిసలాటకు గురికాకుండా జాగ్రత్తగా ఉండాలని టీటీడీ విజ్ఞప్తి చేసింది. సిఫారసు లేఖల ద్వారా దర్శనాలు వారం రోజుల పాటు నిలిపివేశారు. ఈ భారీ రద్దీ మరో రెండు మూడు రోజుల పాటు కొనసాగే అవకాశం ఉందని అధికారులు సూచిస్తున్నారు.