తిరుమల లడ్డు నెయ్యి కల్తీ కేసు: ఫ్యాక్టరీస్ బాయిలర్ శాఖ అధికారులపై విచారణకు ఆదేశం

తిరుమల లడ్డు నెయ్యి కల్తీ వ్యవహారంలో ఫ్యాక్టరీస్ అండ్ బాయిలర్ శాఖ అధికారులపై ఏపీ ప్రభుత్వం శాఖపరమైన విచారణకు ఆదేశించింది. విచారణ మూడు నెలల్లో నివేదిక సమర్పించాలని ప్రభుత్వం స్పష్టం చేసింది.

సిట్ (స్పెషల్ ఇన్వెస్టిగేషన్ టీం) సిఫారసుల మేరకు ఈ ఆదేశాలు జారీ చేశారు. విచారణ అధికారిగా ఉమా మహేశ్వర రావును, ప్రెసెంటింగ్ అధికారిగా జాయింట్ చీఫ్ సెక్రటరీ మోహన్ రావును నియమించారు.

గత ఏడాది తిరుమల లడ్డు ప్రసాదంలో వాడిన నెయ్యిలో జంతు కొవ్వులు కలిసినట్టు ల్యాబ్ రిపోర్ట్లు వెల్లడికావడంతో భక్తుల్లో ఆగ్రహం వ్యక్తమైంది. అనంతరం ఏర్పాటైన సిట్ నివేదికలో అధికారుల నిర్లక్ష్యం ఉన్నట్టు పేర్కొన్నారు.

ఇప్పుడు ఈ విచారణ అధికారి ఆధారాలు సేకరించి, సంబంధిత అధికారుల వాంగ్మూలాలు రికార్డు చేస్తారు. నెయ్యి సరఫరా తప్పనిసరి ల్యాబ్ టెస్ట్ రిపోర్ట్లు సరిగా ఉన్నాయా, కల్తీ నెయ్యి సరఫరా చేసిన కంపెనీ లైసెన్సులు ఎలా వచ్చాయి, అధికారులు తమ విధుల్లో విఫలమయ్యారా అనే అంశాలను పరిశీలిస్తారు.

ఈ విషయంపై ఫ్యాక్టరీస్ బాయిలర్ శాఖ అధికారుల స్పందన తెలియాల్సి ఉంది. భక్తుల విశ్వాసాన్ని దెబ్బతీసే వారిపై కఠిన చర్యలు తీసుకుంటామని ప్రభుత్వం ఇప్పటికే తెలిపింది.