తిరుమలలో సర్వదర్శనానికి 20 గంటల సమయం; సిఫారసు లేఖలు వారం పాటు రద్దు

తిరుమల శ్రీవారి దర్శనానికి భక్తుల రద్దీ కొనసాగుతోంది. సర్వదర్శనానికి ప్రస్తుతం 20 గంటల సమయం పడుతోంది. స్కూళ్లు, కాలేజీలు తెరుచుకోవడం, వీకెండ్ కావడంతో రద్దీ పెరిగింది.

నిన్న ఒక్కరోజే 95,094 మంది భక్తులు స్వామివారిని దర్శించుకున్నారు. 35,909 మంది తలనీలాలు సమర్పించారు. హుండీ ఆదాయం రూ.3.93 కోట్లు లభించింది. 4.66 లక్షల లడ్డూలు విక్రయమయ్యాయి.

రద్దీ నేపథ్యంలో టీటీడీ కీలక నిర్ణయం తీసుకుంది. ఎమ్మెల్యేలు, ఎంపీలు, మంత్రులు ఇచ్చే సిఫారసు లేఖలను వారం రోజుల పాటు రద్దు చేసింది. సామాన్య భక్తులకు దర్శన అవకాశం కల్పించేందుకు ఈ నిర్ణయం తీసుకున్నట్లు టీటీడీ అధికారులు తెలిపారు.

రెండు తెలుగు రాష్ట్రాలతో పాటు తమిళనాడు, కర్ణాటక నుంచి భక్తులు పెద్ద సంఖ్యలో వస్తున్నారు. మరో వారం రోజుల వరకు ఇదే పరిస్థితి కొనసాగుతుందని, ఆ తర్వాత రద్దీ తగ్గే అవకాశం ఉందని అధికారులు అంచనా వేస్తున్నారు.