ఐదు రోజుల్లో 4.32 లక్షల మంది తిరుమల దర్శనం — TTD విస్తృత ఏర్పాట్లు

వేసవి సెలవుల నేపథ్యంలో తిరుమల శ్రీవారి దర్శనానికి భక్తుల రద్దీ గణనీయంగా పెరిగింది. గత ఐదు రోజుల్లో 4,32,213 మంది భక్తులు స్వామివారిని దర్శించుకున్నారు.

ఈ నెల 16, 17 తేదీల్లో అత్యధికంగా 90,000 కు పైగా భక్తులు దర్శనం చేసుకున్నారు. తలనీలాలు సమర్పించే వారి సంఖ్య కూడా పెరిగింది. 18, 19, 20 తేదీల్లో 43,000కు పైగా భక్తులు తలనీలాలు సమర్పించారు.

ఎండల తీవ్రత దృష్ట్యా TTD పలు చర్యలు తీసుకుంది. బాటగంగమ్మ సర్కిల్ నుంచి ఔటర్ రింగ్ రోడ్ వరకు చలువ పందిళ్లు వేశారు. వైకుంఠం క్యూ కాంప్లెక్స్, మ్యూజియం ప్రాంగణం, నారాయణగిరి ఉద్యానవనాల్లో అదనపు షెల్టర్లు నిర్మించారు. నాలుగు మాడవీధుల్లో synthetic enamel cool paint వేయడం ద్వారా భక్తులు నేల వేడి నుంచి ఉపశమనం పొందే ఏర్పాటు చేశారు.

TTD అన్నప్రసాద విభాగం ఆధ్వర్యంలో క్యూ లైన్లలో భక్తులకు నిరంతరం తాగునీరు, అన్నప్రసాదాలు అందిస్తున్నారు. ఉదయం పాలు, ఉప్మా, పొంగల్; మధ్యాహ్నం సాంబార్ అన్నం, పులిహోర, టమాటా రైస్; రాత్రి పాలు, సాంబార్ అన్నం పంపిణీ చేస్తున్నారు. గత ఐదు రోజుల్లో దాదాపు 19 లక్షల మందికి అన్నప్రసాదాలు, టీ, కాఫీ, పాలు, మజ్జిగ అందించారు.

ఔటర్ రింగ్ రోడ్ క్యూ లైన్ల వెంబడి mobile first aid center అందుబాటులో ఉంచారు. తాత్కాలిక మరుగుదొడ్లు కూడా ఏర్పాటు చేశారు. వివిధ విభాగాల అధికారులు, సిబ్బంది దర్శన క్యూ లైన్లు, వైకుంఠం క్యూ కాంప్లెక్స్‌లను నిరంతరం పర్యవేక్షిస్తున్నారు.