యర్పేడు వ్యాసాశ్రమంలో మూడు డిమాండ్లతో ముందుకొచ్చిన పరంపర స్వామీజీలు

తిరుపతి జిల్లా యర్పేడు వ్యాసాశ్రమంలో నిర్వాహకులపై పరంపర స్వామీజీలు, పూర్వ విద్యార్థులు తీవ్ర ఆరోపణలు చేస్తున్నారు. నిన్న జరిగిన చర్చలు విఫలమైన నేపథ్యంలో స్వామీజీలు మూడు ప్రధాన డిమాండ్లు ప్రకటించారు.

పీఠాధిపతి సోదరుడు శివరాం (అసంగానంద), ఆశ్రమ నిర్వాహకుడు అమర్నాథ్ రెడ్డిలను బాధ్యతల నుండి తప్పించాలని వారు కోరుతున్నారు. ఆశ్రమ వ్యవహారాలు చూసేందుకు 21 మంది సభ్యులతో స్వతంత్ర కమిటీ ఏర్పాటు చేయాలని, ఆశ్రమ ఆస్తులు, ఆదాయ వ్యయాల లెక్కలు పూర్తిగా బహిర్గతం చేయాలని డిమాండ్ చేశారు.

అయితే ఆశ్రమ నిర్వాహకులు ఈ డిమాండ్లను తిరస్కరించారు. ఆగస్టు 27 నుండి సెప్టెంబర్ 2 వరకు జరిగే శత జయంతి ఉత్సవాల తర్వాతే అన్ని అంశాలపై నిర్ణయం తీసుకుంటామని చెప్పారు. ఆశ్రమంలో ఎలాంటి వారసత్వ వ్యవస్థ లేదని, గురు శిష్య పరంపరే ఆశ్రమానికి మూల సూత్రమని స్పష్టం చేశారు.

కన్యా గురుకులంలో అమర్నాథ్ రెడ్డి ప్రవర్తనపై పరంపర స్వామీజీలు తీవ్ర ఆరోపణలు చేశారు. అమర్నాథ్ రెడ్డి గతంలో పరీక్ష స్లిప్పులు ఇచ్చేందుకు వెళ్లి స్పాట్‌లో పట్టుబడి పోలీస్‌స్టేషన్‌కు వెళ్లినట్లు స్వస్వరూపానంద స్వామి తెలిపారు. ఆశ్రమంలో యాక్టివిటీస్‌పై ఎండోమెంట్ విభాగానికి ఫిర్యాదు చేసినా చర్యలు తీసుకోలేదని, సనాతన ధర్మ పరిరక్షణ కోసం ఏపీ సీఎం చంద్రబాబు, డిప్యూటీ సీఎం పవన్ కళ్యాణ్ జోక్యం చేసుకోవాలని వారు విజ్ఞప్తి చేశారు.

నేడు మరోసారి స్వస్వరూపానంద స్వామికి సంబంధించిన విశిష్టాశ్రమంలో పరంపర స్వామీజీలు భేటీ కానున్నారు. తదుపరి కార్యాచరణపై నిర్ణయం తీసుకుంటామని చెప్పారు. వివాదం ప్రభుత్వ జోక్యం దిశగా వెళ్తుందా లేదా అన్నది వేచి చూడాలి.