తిరుపతి జిల్లా ఏర్పేడు వ్యాసాశ్రమంలో నిధుల దుర్వినియోగం ఆరోపణలతో ఉద్రిక్తత

తిరుపతి జిల్లా ఏర్పేడు మండలంలోని శ్రీ వ్యాసాశ్రమంలో శతాబ్ది ఆరాధోత్సవాలు కొనసాగుతుండగా ఉద్రిక్తత నెలకొంది. మఠాధిపతి మేనేజర్ అమర్నాథ్ రెడ్డి నిధుల దుర్వినియోగం, అక్రమాలకు పాల్పడుతున్నారంటూ పరంపర స్వామీజీలు, పూర్వ విద్యార్థులు ఆరోపణలు చేశారు.

ఈ ఆరోపణల నేపథ్యంలో వారు ‘చలో ఏర్పేడు’కు పిలుపునిచ్చారు. ప్రస్తుత పీఠాధిపతి పరిపూర్ణానందగిరి స్వామి స్వామీజీలు, పూర్వ విద్యార్థులతో సమావేశం ఏర్పాటు చేశారు. ఈ బేటీని కాళహస్తి ఆర్డీఓ, రేణిగుంట డీఎస్పీ పర్యవేక్షించనున్నారు.

నిరసనకారులు మూడు ప్రధాన డిమాండ్లు ముందుకెళ్లారు. పరిపూర్ణానందగిరి స్వామి పీఠాధిపతిగా కొనసాగించాలని, 21 మంది సభ్యులతో కమిటీ ఏర్పాటు చేయాలని, మేనేజర్ అమర్నాథ్ రెడ్డిని, పీఠాధిపతి సోదరుడు శివరామ్ స్వామిని తక్షణమే ఆశ్రమం నుంచి తొలగించాలని డిమాండ్ చేశారు.

ఆశ్రమం సుమారు 100 సంవత్సరాల చరిత్ర కలిగి, కోట్లాది రూపాయల ఆస్తులు, భూములు కలిగి ఉందని స్థానిక వర్గాలు తెలియజేశాయి. 2008లో మాజీ మఠాధిపతి ఏర్పాటు చేసిన ట్రస్ట్‌ను రద్దు చేసి, నిధులు దుర్వినియోగం చేశారని, అలాగే లైంగిక ఆరోపణలు ఉన్నాయని కొందరు స్వామీజీలు ఆరోపించారు.

ఆశ్రమంలో బాలికల పాఠశాల మాత్రమే కొనసాగుతుండగా, బాలుర పాఠశాల నిలిపివేశారు. మేనేజర్ మహిళా హాస్టల్ నిర్వహణలో జోక్యం చేసుకుంటున్నారని విమర్శలు వచ్చాయి. ఘటనా స్థలంలో సుమారు 100 మంది పోలీసులు బందోబస్తు నిర్వహించారు.

నిరసనకారులు ముఖ్యమంత్రి చంద్రబాబు నాయుడు, ఉపముఖ్యమంత్రి పవన్ కళ్యాణ్, దేవాదాయ శాఖ అధికారులు జోక్యం చేసుకోవాలని, ఆశ్రమ భూములను క్రమబద్ధీకరించి, అన్యాక్రాంతమైన భూములను స్వాధీనం చేసుకోవాలని, పారదర్శకంగా దర్యాప్తు జరపాలని డిమాండ్ చేశారు. డిమాండ్లు నెరవేరకపోతే పదివేల మంది స్వామీజీలతో మఠాన్ని స్వాధీనం చేసుకుంటామని హెచ్చరించారు.

రాబోయే రెండు మూడు రోజుల్లో ఆర్డీఓ స్థాయి అధికారి మఠాన్ని సందర్శించి దర్యాప్తు చేయనున్నారు. సమావేశం అనంతరం పరిస్థితి స్పష్టమవుతుందని భావిస్తున్నారు.