పొగాకు రైతులకు ఆర్థిక సాయంపై సోమవారం తుది నిర్ణయం

ముఖ్యమంత్రి చంద్రబాబు నాయుడు శనివారం కేంద్ర వాణిజ్య మంత్రిత్వ శాఖ అధికారులతో సమావేశమయ్యారు. పొగాకు రైతులకు ఆర్థిక సాయం అందించే అంశంపై చర్చించారు.

కేంద్ర అదనపు కార్యదర్శి నితిన్ కుమార్, డైరెక్టర్ మౌనికా గౌర్ ఈ సమావేశంలో పాల్గొన్నారు. కేంద్ర మంత్రి పెమ్మసాని చంద్రశేఖర్, రాష్ట్ర మంత్రులు గొట్టిపాటి రవికుమార్, డీఎస్బీవీ స్వామి తదితరులు హాజరయ్యారు.

ప్రభుత్వం రైతులకు రెండేళ్ల వడ్డీ లేని రుణం లేదా కిలో పొగాకుకు 20 రూపాయల వరకు తాత్కాలిక ఆర్థిక సహాయం అందించే ప్రతిపాదనలు చేసింది. 2015లో టీడీపీ హయాంలో కూడా కిలోకు 20 రూపాయలు సాయం ఇచ్చారని గుర్తు చేశారు.

ప్రజా ప్రతినిధులు కొన్ని ఆందోళనలు వ్యక్తం చేశారు. ఈ సాయాన్ని సాకుగా చూపి వ్యాపారులు ధర మరింత తగ్గిస్తారని అనుమానం వ్యక్తం చేశారు. పొగాకు గ్రేడ్ల వారీగా ధరలు నిర్ణయించాలని సూచించారు. వ్యాపారులు కనీస ధర హామీ ఇవ్వాలని కేంద్ర మంత్రి పెమ్మసాని చంద్రశేఖర్ అన్నారు.

కేంద్ర వాణిజ్య మంత్రిత్వ శాఖ మూడు ప్రతిపాదనలు సిద్ధం చేసింది. కిలోకు 20 రూపాయల ఆర్థిక సాయం, 50 వేల నుంచి లక్ష రూపాయల వడ్డీ లేని రుణం వంటివి ఉన్నాయి. ఈ ప్రతిపాదనలపై సోమవారం ఢిల్లీలో కేంద్ర వాణిజ్య శాఖ మంత్రి పియూష్ గోయల్ నేతృత్వంలో సమావేశం జరగనుంది. అక్కడే తుది నిర్ణయం తీసుకునే అవకాశం ఉంది.