తొలి ఏకాదశి: వికృతమాల సంతాన సంపద వెంకటేశ్వర స్వామి ఆలయంలో భక్తుల రద్దీ, ప్రత్యేక పూజలు

తొలి ఏకాదశి సందర్భంగా తిరుపతి సమీపంలోని వికృతమాల గ్రామంలో వెలిసిన సంతాన సంపద వెంకటేశ్వర స్వామి ఆలయానికి భక్తులు పోటెత్తారు.

ఆలయంలో ప్రత్యేక పూజలు, వేద పారాయణం నిర్వహించారు. 20 మంది వేద పారాయణదారులు వేద పారాయణం చేశారని ఆలయ చైర్మన్ పసుపులేటి హరిప్రసాద్ తెలిపారు. ఉదయం సుప్రభాతం, తోమాల సేవ, నైవేద్యంతోపాటు సాయంత్రం ఏకాంత సేవ వరకు పూజలు కొనసాగాయి.

ఈ ఆలయం 13 సంవత్సరాల క్రితం పునర్నిర్మించి, మే 29న ప్రతిష్ఠించారని హరిప్రసాద్ వివరించారు. తిరుపతికి తూర్పున ఉన్న ఈ ఆలయం సంతాన ప్రాప్తి కోసం భక్తులు దర్శించుకుంటారు. వికృతమాల ఒక చిన్న తిరుమలగా మారాలని ఆకాంక్షిస్తున్నట్లు చెప్పారు.

భవిష్యత్ ప్రణాళికల గురించి మాట్లాడుతూ, రాబోయే ఒకటి రెండేళ్లలో కోనేరు, 108 స్తంభాల మండపం, బ్రహ్మోత్సవాలతోపాటు యోగ నరసింహ స్వామి, రామానుజాచార్యులు, వరదరాజ స్వామి, వకుళమాత ఆలయాలు నిర్మించనున్నట్లు తెలిపారు. విదేశాల నుంచి, తిరుమల యాత్రికులుగా వచ్చే భక్తులు కూడా ఈ ఆలయాన్ని సందర్శిస్తున్నారు.

తిరుమల తిరుపతి దేవస్థానం (టీటీడీ) బోర్డు సభ్యుడిగా తన నియామకం పవన్ కల్యాణ్ సిఫారసుతో జరిగిందని, అది దైవానుగ్రహంగా భావిస్తున్నానని హరిప్రసాద్ చెప్పారు.