టమాటా ధర కిలో ₹2-3కు పతనం; మదనపల్లె రైతులు దారుణంగా నష్టపోతున్నారు

ఆంధ్రప్రదేశ్ లోని మదనపల్లె మార్కెట్లో టమాటా ధర ఒక్కసారిగా కిలో రెండు నుంచి మూడు రూపాయలకు పతనమైంది. కిందటి నెలలో కిలో ₹50 నుంచి ₹100 వరకు అమ్మకాలు జరిగిన టమాటా ఇప్పుడు భారీగా దిగివచ్చింది.

దిగుబడి పెరగడం, ఇతర రాష్ట్రాలకు ఎగుమతులు తగ్గడంతో ధరలు నేలకు పడిపోయాయి. మార్కెట్లో సరుకు ఎక్కువై డిమాండ్ తగ్గడంతో రైతులకు నష్టాలు కలుగుతున్నాయి. కొంతమంది రైతులు పండిన టమాటాను పశువులకు మేతగా పారేస్తున్నారు. మార్కెట్ కు తీసుకెళ్లినా దళారులు చాలా తక్కువ ధర ఇస్తున్నారని, రాను పోను ఖర్చులకే సరిపడడం లేదని రైతులు ఆవేదన వ్యక్తం చేస్తున్నారు.

టమాటా రైతులు ప్రభుత్వ సహాయం అడుగుతున్నారు. ఇటీవల మామిడి రైతులకు సాయం చేసినట్లే తమకు కూడా ఆదుకోవాలని విజ్ఞప్తి చేస్తున్నారు. ఈ విషయంపై ప్రభుత్వ స్పందన తెలియాల్సి ఉంది.