లష్కర్ బోనాల పండుగ: సికింద్రాబాద్‌లో ట్రాఫిక్ ఆంక్షలు, డైవర్షన్లు

లష్కర్ బోనాల పండుగ సందర్భంగా సికింద్రాబాద్ ఉజ్జయిని మహంకాళి అమ్మవారి ఆలయం చుట్టూ ట్రాఫిక్ ఆంక్షలు, డైవర్షన్లు అమలులోకి వచ్చాయి.

ఈ ఆంక్షలు నేటి నుంచి ఆగస్టు 4న జాతర ముగిసే వరకు కొనసాగుతాయని హైదరాబాద్ ట్రాఫిక్ పోలీసులు తెలిపారు. ఆలయం చుట్టూ 2 కిలోమీటర్ల పరిధిలో ఈ నిబంధనలు అమలవుతాయి. పొగాకు బజార్, హమాలి విగ్రహం నుంచి ఆలయానికి వెళ్లే మార్గాలను పూర్తిగా మూసివేశారు. బాటా క్రాస్ రోడ్, రోచా బజార్, సుభాష్ రోడ్, అడవయ్య క్రాస్ రోడ్, హెల్ స్ట్రీట్‌లలో వాహనాల రాకపోకలను నిలిపివేశారు.

ట్రాఫిక్ డైవర్షన్లలో భాగంగా ఎస్బీఐ క్రాస్ రోడ్, పారడైజ్ నుంచి ట్యాంక్ బండ్ వైపు వెళ్లే వాహనాలను పాట్నీ, మినిస్టర్ రోడ్, క్లాక్ టవర్, సంగీత్, చిలకలగూడ, కబాడీగూడ మీదుగా మళ్లిస్తున్నారు. పారడైజ్ నుంచి బైబిల్ హౌస్ వెళ్లే వాహనాలు పాట్నీ నుంచి ఎస్బీఐ క్రాస్ రోడ్, క్లాక్ టవర్ వైపు వెళ్తాయి. సిటీఓ నుంచి ఎంజీ రోడ్ వైపు వచ్చే వాహనాలు పారడైజ్, సింధీ కాలనీ, మినిస్టర్ రోడ్ మార్గంలో వెళ్లాలి. భారీ వాహనాలు కర్బలా మైదాన్, రాణిగంజ్ మీదుగా మళ్లిస్తున్నారు. ఆర్టీసీ బస్సులు రాణిగంజ్ నుంచి మినిస్టర్ రోడ్, రఫీపూర్ వైపు వెళ్తాయి.

భక్తుల సౌకర్యార్థం 20 ప్రత్యేక పార్కింగ్ స్థలాలను గుర్తించారు. హరిహర కళాభవన్, మహబూబ్ కాలేజీ, సీఎంఆర్ షాపింగ్ మాల్, ఓల్డ్ జైల్ ఖానా గ్రౌండ్, నల్లగుట్ట జీహెచ్ఎంసీ గ్రౌండ్, వెస్లీ కాలేజీ, జింఖానా గ్రౌండ్ వంటి ప్రాంతాల్లో పార్కింగ్ ఏర్పాటు చేశారు.

భద్రత కోసం 2,500 మంది పోలీసు సిబ్బందిని నియమించారు. హైదరాబాద్ సీపీ సజ్జనార్ పర్యవేక్షణలో ట్రాఫిక్, లా అండ్ ఆర్డర్, షీ టీమ్స్, టాస్క్ ఫోర్స్ బృందాలు విధులు నిర్వహిస్తున్నాయి. మహంకాళి పోలీస్ స్టేషన్‌లో కంట్రోల్ రూమ్ ఏర్పాటు చేసి, సీసీ కెమెరాలతో నిఘా ఉంచుతున్నారు. వైద్య సేవల కోసం ప్రత్యేక వైద్య బృందాలు అందుబాటులో ఉన్నాయి. భక్తులు అధికారులు సూచించిన నిబంధనల ప్రకారం క్యూ లైన్లలో వెళ్లి దర్శనం చేసుకోవాలని, నిర్దేశిత పార్కింగ్ స్థలాల్లోనే వాహనాలు నిలపాలని పోలీసులు విజ్ఞప్తి చేశారు.