సికింద్రాబాద్‌లో ఉజ్జయినీ మహంకాళీ బోనాల జాతర నేపథ్యంలో ట్రాఫిక్ ఆంక్షలు

ఉజ్జయినీ మహంకాళీ బోనాల జాతర సందర్భంగా సికింద్రాబాద్‌లో ఆగస్టు 2 నుంచి 4 వరకు ట్రాఫిక్ ఆంక్షలు అమలు చేస్తున్నట్లు హైదరాబాద్ ట్రాఫిక్ పోలీసులు ప్రకటించారు. మహంకాళీ ఆలయం చుట్టూ 2 కిలోమీటర్ల పరిధిలో ఈ ఆంక్షలు వర్తిస్తాయి.

పోగాకు బజార్, సుభాష్ రోడ్, హిల్ స్ట్రీట్ రహదారులను పూర్తిగా మూసివేయనున్నారు. జనరల్ బజార్, మహంకాళీ ఆలయ మార్గంలో వాహనాల రాకపోకలకు నిషేధం విధించారు. భక్తుల సౌకర్యార్థం 14 ప్రత్యేక పార్కింగ్ కేంద్రాలు ఏర్పాటు చేశారు.

హరిహర కళాభవన్, వెస్లీ కళాశాల, మెహబూబ్ కళాశాల, సీఎంఆర్ మాల్, జింకానా గ్రౌండ్స్, స్వప్న లాడ్జీ వంటి ప్రాంతాల్లో ఈ పార్కింగ్లను ఏర్పాటు చేసినట్లు తెలిపారు. ట్యాంక్‌బండ్ నుంచి వచ్చే వాహనాలను పారడైజ్ మీదుగా క్లాక్ టవర్ వైపు మళ్లిస్తారు. సికింద్రాబాద్ రైల్వే స్టేషన్ నుంచి వచ్చే వాహనాలను క్లాక్ టవర్ నుంచి ఆర్పీ రోడ్ ఎస్బీఐ వైపు మళ్లించనున్నారు.

ఆర్టీసీ బస్సులకు మాత్రం ఆలయానికి సమీపంగా వెళ్లేందుకు ప్రత్యేక అనుమతి ఇచ్చారు. ఆదివారం (ఆగస్ట్ 3) జరిగే బోనాల జాతరకు లక్షల మంది భక్తులు హాజరయ్యే అవకాశం ఉన్నందున ట్రాఫిక్ డైవర్షన్‌లను కచ్చితంగా పాటించాలని పోలీసులు సూచించారు. వాహనదారులు తమ ప్రయాణాన్ని ముందుగానే ప్లాన్ చేసుకోవాలన్నారు.

ఈ మూడు రోజుల పాటు సికింద్రాబాద్‌లో ట్రాఫిక్ నియంత్రణకు అదనపు సిబ్బంది మోహరించనున్నట్లు జాయింట్ సీపీ జోయెల్ డేవిస్ తెలిపారు. భక్తులు అధికారుల సూచనలను పాటించి, ప్రత్యేక పార్కింగ్ ప్రదేశాలను వినియోగించుకోవాలని విజ్ఞప్తి చేశారు.