ట్రైనీ IPS ఉదయ కృష్ణా రెడ్డికి కోర్టు 2 రోజుల పోలీస్ కస్టడీ

ట్రైనీ IPS అధికారి ఉదయ కృష్ణా రెడ్డిపై లైంగిక వేధింపుల ఆరోపణల కేసులో ఉప్పరపల్లి కోర్టు రెండు రోజుల పోలీస్ కస్టడీకి ఆదేశించింది. కోర్టు అనుమతితో రాజేంద్రనగర్ సబ్‌డివిజన్ పోలీసులు ఆయనను కస్టడీలోకి తీసుకుని విచారిస్తున్నారు.

ఉదయ కృష్ణా రెడ్డి గతంలో కానిస్టేబుల్‌గా పనిచేస్తూ IPS పరీక్షలో విజయం సాధించారు. సోషల్ మీడియాలో ఆయన కథ విస్తృతంగా వైరల్ అయ్యింది. హైదరాబాద్‌లోని సర్దార్ వల్లభాయ్ పటేల్ జాతీయ పోలీస్ అకాడమీలో శిక్షణ పొందుతున్న సమయంలో ఒక మహిళా ట్రైనీ IPS అధికారి తనను ఆయన వేధిస్తున్నారని ఫిర్యాదు చేశారు.

పోలీసులు అత్తాపూర్‌లో కేసు నమోదు చేసి ఉదయ కృష్ణా రెడ్డిని అరెస్ట్ చేసి రిమాండ్‌కు తరలించారు. డీఎస్పీ లావణ్య నాయక్ జాదవ్ ఈ దర్యాప్తును పర్యవేక్షిస్తున్నారు. విచారణలో ఆయన మరో మహిళతో సన్నిహిత సంబంధం ఉన్నట్లు ఆధారాలు లభించాయి.

ప్రకాశం జిల్లాకు చెందిన ఉదయ కృష్ణా రెడ్డి, ఆంధ్రప్రదేశ్‌కు చెందిన ఆ మహిళతో పరిచయం పెంచుకున్నారు. ఆమె 2014లో వివాహం చేసుకొని 2023 నుంచి భర్తకు దూరంగా హైదరాబాద్‌లో నివసిస్తోంది. ఉదయ కృష్ణా రెడ్డి సూచనతో ఈ ఏడాది జనవరిలో ఆమె ప్రైవేట్ ఉద్యోగానికి రాజీనామా చేశారు.

లివిన్ రిలేషన్‌లో ఉండాలని ఉదయ కృష్ణా రెడ్డి కోరగా, విడాకులు రాకపోవడంతో ఆమె తిరస్కరించినట్లు తెలుస్తోంది. ప్రస్తుతం పోలీసులు కస్టడీలోకి తీసుకున్న ఆయనను విచారిస్తున్నారు.