ట్రైనీ ఐపీఎస్ ఉదయ్ కృష్ణారెడ్డి హైదరాబాద్ చేరుకుని విచారణకు సిద్ధం

ట్రైనీ ఐపీఎస్ ఉదయ్ కృష్ణారెడ్డి హైదరాబాద్‌లోని అత్తాపూర్ పోలీస్ స్టేషన్‌కు చేరుకున్నారు. ఓ మహిళా ట్రైనీ ఐపీఎస్ ఫిర్యాదుపై ఆయనను పోలీసులు విచారించనున్నారు.

ఈ కేసుకు సంబంధించి డీఎస్పీ లావణ్య నేతృత్వంలో ప్రత్యేక దర్యాప్తు బృందం (సిట్) ఏర్పాటైంది. ఆసుపత్రి నుంచి డిశ్చార్జ్ అయిన తర్వాత ఉదయ్ కృష్ణారెడ్డి పోలీసులకు అందుబాటులో లేరని కొద్ది రోజులుగా వార్తలు వచ్చాయి.

అయితే తాను ఎక్కడా పరారై లేదని, పోలీస్, న్యాయ వ్యవస్థలపై సంపూర్ణ విశ్వాసం ఉందని ఉదయ్ తెలిపారు. “నాపై వచ్చిన ఫిర్యాదులన్నీ అవాస్తవం. విచారణ అధికారులకు పూర్తి సహకారం అందిస్తాను. త్వరలో నా నిర్దోషిత్వం నిరూపించుకుంటాను” అని ఆయన చెప్పారు.

ఈ విషయం కోర్టు పరిధిలో ఉన్నందున వివరాలు చెప్పలేనని ఆయన పేర్కొన్నారు. సిట్ ముందు హాజరై విచారణకు సహకరించేందుకు హైదరాబాద్ చేరుకున్నట్లు తెలిపారు. ఫిర్యాదు చేసిన మహిళా ట్రైనీ ఐపీఎస్‌ను ఇప్పటికే విచారణ అధికారులు ప్రశ్నించారు.