ఆదిలాబాద్ సరిహద్దులో రవాణా శాఖ ఆకస్మిక తనిఖీలు: రెండు బస్సులు సీజ్

తెలంగాణ-మహారాష్ట్ర సరిహద్దులో రవాణా శాఖ అధికారులు ఆకస్మిక తనిఖీలు నిర్వహించారు. గేట్వే ఆఫ్ తెలంగాణగా పేరొందిన ఉమ్మడి ఆదిలాబాద్ జిల్లాలో 44వ జాతీయ రహదారిపై పిప్పర్‌వాడా వద్ద అర్ధరాత్రి నుండి తెల్లవారుజామున వరకు ఈ తనిఖీలు జరిగాయి.

ఉత్తర భారతదేశం నుండి తెలంగాణలోకి ప్రవేశిస్తున్న ప్రైవేట్ బస్సులు మరియు లారీలను అధికారులు పరిశీలించారు. గత ఆగస్టులో అంతర్రాష్ట్ర చెక్‌పోస్టులను రాష్ట్ర ప్రభుత్వం రద్దు చేసిన తర్వాత నిబంధనల ఉల్లంఘనలు పెరిగాయని తేలింది.

ఈ తనిఖీల్లో రెండు బస్సులను అధికారులు సీజ్ చేశారు. 31 సీట్ల సామర్థ్యం ఉన్న బస్సులలో 40 కంటే ఎక్కువ మంది ప్రయాణికులను తీసుకెళ్ళడం అంటే ఓవర్‌లోడింగ్ ఆఫ్ ప్యాసెంజర్స్ జరుగుతున్నదని వెల్లడైంది. అలాగే చెల్లుబాటు అయ్యే పత్రాలు లేకుండా మరియు పన్ను చెల్లించకుండా నడుస్తున్న వాహనాలపై కేసులు నమోదు చేశారు.

చెక్‌పోస్టులు ఉన్న సమయంలో ప్రతి వాహనాన్ని క్షుణ్ణంగా తనిఖీ చేసేవారని, అప్పుడు ఓవర్‌లోడింగ్ సాధ్యం కాలేదని అధికారులు వివరించారు. ఇప్పుడు ఎవరికి వారు వేర్వేరుగా తనిఖీలు నిర్వహిస్తున్నారని, రవాణా శాఖ, ఎక్సైజ్ శాఖ మరియు కమర్షియల్ టాక్స్ అధికారులు వేర్వేరుగా తమ శాఖకు సంబంధించిన వాహనాలను పర్యవేక్షిస్తున్నారని తెలిపారు.

జిల్లా వ్యాప్తంగా నిరంతరం తనిఖీలు కొనసాగిస్తామని, హైవేలపైనే కాకుండా లోపలి రోడ్లపై కూడా పన్ను చెల్లించని వాహనాలు, ట్రాక్టర్లపై కేసులు నమోదు చేస్తామని రవాణా శాఖ అధికారులు స్పష్టం చేశారు. నిర్దేశిత టార్గెట్ ప్రకారం రెగ్యులర్‌గా చెకింగ్ కొనసాగిస్తామని వారు హామీ ఇచ్చారు.