క్రిప్టో ద్వారా ట్రంప్‌కు రూ.11,367 కోట్ల ఆదాయం: US నివేదిక

అమెరికా మాజీ అధ్యక్షుడు డోనాల్డ్ ట్రంప్ 2025లో క్రిప్టో కరెన్సీ ద్వారా దాదాపు $1.36 బిలియన్ (రూ.11,367 కోట్లు) ఆదాయాన్ని ఆర్జించినట్లు US ఆఫీస్ ఆఫ్ గవర్న్మెంట్ ఎథిక్స్ నివేదిక వెల్లడించింది.

2024లో ట్రంప్ కుటుంబం ప్రారంభించిన వరల్డ్ లిబర్టీ ఫైనాన్షియల్ అనే క్రిప్టో ప్లాట్ఫామ్ ద్వారా వీరి సంస్థ జారీ చేసిన DLFI టోకెన్ల తొలి విక్రయం ద్వారానే $550 మిలియన్‌కు పైగా వచ్చింది. అదనంగా డీటీ మార్క్స్ డెఫీ అనే అనుబంధ సంస్థ ద్వారా ట్రంప్, ఆయన ముగ్గురు కుమారులు డీఎల్‌ఎఫ్‌ఐ టోకెన్లను సొంతం చేసుకున్నారు.

2025 ఏప్రిల్లో వరల్డ్ లిబర్టీ ఫైనాన్షియల్ అమెరికా డాలర్‌తో ముడిపడిన స్థిరమైన డిజిటల్ కరెన్సీని మార్కెట్‌లోకి తీసుకొచ్చింది. అంతేకాకుండా, అధ్యక్ష పదవి ప్రమాణ స్వీకారానికి ముందు ట్రంప్ తన పేరిట 'ట్రంప్ క్రిప్టో' కరెన్సీని విడుదల చేయగా, లైసెన్సింగ్ ఒప్పందం కింద $635 మిలియన్ల రాయల్టీలు అందాయి.

ఫోర్బ్స్ మ్యాగజైన్ లెక్కల ప్రకారం 2024-2026 మధ్య ట్రంప్ సంపద $2.3 బిలియన్ నుంచి $6.5 బిలియన్‌కు పెరిగింది. గతంలో బిట్‌కాయిన్‌ను విమర్శించిన ట్రంప్ ఇప్పుడు క్రిప్టో రంగానికి మద్దతు పలుకుతూ వ్యక్తిగత లాభాలు పొందడం గమనార్హం.