2026 ఫిఫా ప్రపంచ కప్ ట్రోఫీని అందజేసేందుకు ట్రంప్‌కు ఆహ్వానం

2026 ఫిఫా వరల్డ్ కప్ ట్రోఫీని ప్రదానం చేసే బాధ్యత అమెరికా అధ్యక్షుడు డొనాల్డ్ ట్రంప్‌కు దక్కనుంది. ఈ విషయాన్ని ట్రంప్ స్వయంగా వెల్లడించారు. ఫిఫా అధ్యక్షుడు జియాని ఇన్ఫాంటినో ఈ అవకాశం కోసం తనను ఆహ్వానించినట్టు ట్రంప్ చెప్పారు. 'ఫుట్‌బాల్, సాకర్ ద్వారా, జానీ (ఇన్ఫాంటినో) ద్వారా నన్ను అడిగారు' అని ట్రంప్ పేర్కొన్నారు. ఇన్ఫాంటినో చేస్తున్న పనిని ట్రంప్ ప్రశంసించారు. అమెరికా, కెనడా, మెక్సికో దేశాలు సంయుక్తంగా 2026 వరల్డ్ కప్‌ను నిర్వహిస్తున్నాయి. జూలై 19న న్యూజెర్సీలోని మెట్‌లైఫ్ స్టేడియంలో ఫైనల్ మ్యాచ్ జరగనుంది. ఈ ఫైనల్‌లోనే ట్రంప్ ట్రోఫీని విన్నర్‌కు అందచేయనున్నారు. ఈ వరల్డ్ కప్ ఇప్పటివరకు జరిగిన వాటిల్లో అతి పెద్దదని, రికార్డు స్థాయి సంఖ్యలు నమోదయ్యాయని ట్రంప్ కొనియాడారు. 'ఇది ఎంతో గొప్ప స్ఫూర్తినిచ్చింది' అని ఆయన అన్నారు. ఇటీవలే ఇన్ఫాంటినో వైట్ హౌస్‌లో ట్రంప్‌ను కలిశారు. ఆ సమావేశంలోనే ఈ ప్రతిపాదన తెరపైకి వచ్చినట్లు సమాచారం. ప్రపంచకప్ నిర్వహణకు అవసరమైన అన్ని ఏర్పాట్లు అమెరికా చేస్తోందని, టికెట్లు, హోటళ్లు, రవాణా వంటి వాటిలో డిమాండ్ విపరీతంగా ఉందని ట్రంప్ తెలిపారు. ఫిఫా వరల్డ్ కప్ ట్రోఫీ ప్రొఫెషనల్ సాకర్‌లో అత్యున్నత గౌరవ చిహ్నం. 1974 నుంచి విజేత జట్టుకు ఈ ట్రోఫీ బహుకరించబడుతోంది. అమెరికా అధ్యక్షుడి చేతుల మీదుగా ట్రోఫీని అందుకోవడం చారిత్రాత్మకంగా నిలుస్తుంది.