ఇరాన్ నిల్వలు విడుదల: 'అది మన డబ్బు కాదు, వారిదే' అన్న ట్రంప్

అమెరికా అధ్యక్షుడు డొనాల్డ్ ట్రంప్ ఇరాన్ స్తంభింప చేసిన నిధుల విడుదల విషయంలో కీలక వ్యాఖ్యలు చేశారు. ఇరాన్ నిధులను విడుదల చేయడం అమెరికా డబ్బు ఇవ్వడం కాదని, అవి ఇరాన్‌కు చెందినవేనని, ఎప్పుడో ఒకప్పుడు తిరిగి ఇవ్వాల్సిందేనని స్పష్టం చేశారు. ఇండియా టుడేతో మాట్లాడుతూ ఆయన ఈ వివరణ ఇచ్చారు. 'మనం వారి డబ్బు చాలా స్వాధీనం చేసుకున్నాం. అది మన డబ్బు కాదు, వారి డబ్బు. మనం స్తంభింపజేశాం. ఒక సమయంలో తిరిగి ఇవ్వాల్సి వస్తుంది. ఇవ్వకపోతే డాలర్‌లో ఎవరూ పెట్టుబడి పెట్టరు' అని ట్రంప్ తెలిపారు.

ఇరాన్ అణు ఒప్పందం (JCPOA) ఉల్లంఘన ఆరోపణలతో అమెరికా 2018 నుంచి ఇరాన్ విదేశీ ఆస్తులను స్తంభింపజేసింది. ఇప్పుడు ఈ నిధులు విడుదల చేస్తే ఇరాన్ చమురు అమ్మకాలు, పునర్నిర్మాణ నిధి యాక్సెస్ ద్వారా బిలియన్ల డాలర్లు సంపాదిస్తుందనే చర్చ నేపథ్యంలో ట్రంప్ స్పందించారు. 'వారు సరిగా ప్రవర్తిస్తేనే ఈ నిధులు ఇస్తాం. లేదంటే మళ్లీ దాడులు చేస్తాం' అని హెచ్చరించారు. ఇరాన్‌కు ట్రిలియన్ డాలర్లకుపైగా నష్టం జరిగిందని, పునర్నిర్మాణానికి 15 నుంచి 20 ఏళ్లు పడుతుందని కూడా చెప్పారు. ఇరాన్ తీరుపైనే నిధుల విడుదల ఆధారపడి ఉంటుందని స్పష్టం చేశారు. కాగా, 300 మిలియన్ డాలర్ల పునర్నిర్మాణ నిధి గురించి ప్రస్తావిస్తూ, అది కూడా ఇరాన్ సరైన దిశలో నడిస్తేనే అందుతుందన్నారు. ఇరాన్ విమాన నిరోధక వ్యవస్థలను తిరిగి నిర్మించుకోవడం చాలా కష్టమని, అమెరికా సులభంగా దాడి చేయగలదని కూడా ట్రంప్ హెచ్చరించారు. ఈ ప్రకటనతో ఇరాన్‌పై అమెరికా వైఖరి మరింత స్పష్టమైంది.